വൈദ്യുതി വാങ്ങൽ തീരുമാനങ്ങളെച്ചൊല്ലി സർക്കാരിനുള്ളിൽ ഉയർന്ന ഭിന്നത ഭരണതലത്തിലെ ഏകോപനക്കുറവിലേക്കും രാഷ്ട്രീയ പ്രതിസന്ധിയിലേക്കും നീങ്ങുന്നതിനിടെയാണ് നിർണായക ഇടപെടലുണ്ടായത്. ജി.എൻ.എയുമായുള്ള വൈദ്യുതി കരാർ റദ്ദാക്കിയതും ഹിമാചൽ പ്രദേശിൽ നിന്ന് വൈദ്യുതി വാങ്ങാനുള്ള നീക്കങ്ങളും വിവാദമായതോടെ വൈദ്യുതി മന്ത്രി സണ്ണി ജോസഫ് പരസ്യമായി അതൃപ്തി പ്രകടിപ്പിച്ചിരുന്നു. കരാർ റദ്ദാക്കിയ വിവരം മാധ്യമങ്ങളിലൂടെയാണ് അറിഞ്ഞതെന്ന മന്ത്രിയുടെ വെളിപ്പെടുത്തൽ സർക്കാരിനുള്ളിൽ വലിയ ചർച്ചകൾക്ക് വഴിവെച്ചു. കെ.എസ്.ഇ.ബി ചെയർമാനും ഊർജ സെക്രട്ടറിയും തന്നെ അറിയിക്കാതെ തീരുമാനങ്ങളെടുക്കുന്നുവെന്നായിരുന്നു മന്ത്രിയുടെ പ്രധാന പരാതി.
വിവാദം കൂടുതൽ രൂക്ഷമാകാതിരിക്കാൻ മുഖ്യമന്ത്രി വി.ഡി. സതീശന്റെ നേതൃത്വത്തിൽ ക്ലിഫ് ഹൗസിൽ ഉന്നതതല ചർച്ച നടന്നു. മുതിർന്ന നേതാവ് രമേശ് ചെന്നിത്തലയുടെ ഇടപെടലും ഈ ചർച്ചയിൽ നിർണായകമായെന്നാണ് റിപ്പോർട്ടുകൾ. കെ.എസ്.ഇ.ബി ചെയർമാൻ എൻ. പ്രശാന്തും മന്ത്രി സണ്ണി ജോസഫും തമ്മിലുള്ള ആശയവിനിമയത്തിലെ വിടവ് നികത്തുന്നതിനും നീക്കമുണ്ടായി. യോഗത്തിന് തൊട്ടുമുമ്പ് എൻ. പ്രശാന്ത് മന്ത്രിയുമായി കൂടിക്കാഴ്ച നടത്തി വിവാദ തീരുമാനങ്ങളുമായി ബന്ധപ്പെട്ട വിശദീകരണങ്ങൾ നൽകിയിരുന്നു. തുടർന്ന് നടന്ന ചർച്ചയിൽ മുഖ്യമന്ത്രിയും മന്ത്രിയും തമ്മിലുള്ള അഭിപ്രായവ്യത്യാസങ്ങൾ പരിഹരിക്കാനുള്ള സമവായത്തിലേക്ക് കാര്യങ്ങൾ നീങ്ങി.
അതേസമയം, സംസ്ഥാനത്ത് നിലവിൽ വൈദ്യുതി ക്ഷാമമില്ലെന്നും അടുത്ത രണ്ട് മാസത്തേക്ക് പുറത്തുനിന്ന് വൈദ്യുതി വാങ്ങേണ്ട അടിയന്തര സാഹചര്യമില്ലെന്നുമാണ് ഉദ്യോഗസ്ഥർ യോഗത്തിൽ വ്യക്തമാക്കിയത്. ഇതോടെ നവംബർ ഒന്നു മുതൽ പവർകട്ട് ഉണ്ടാകുമെന്ന തരത്തിൽ ഉയർന്ന ആശങ്കകൾക്കും വിരാമമായി. വരാനിരിക്കുന്ന വേനൽക്കാലത്തെ വൈദ്യുതി ആവശ്യകത കണക്കിലെടുത്ത് പുതിയ കരാറുകൾ സുതാര്യമായി പരിശോധിക്കാനും തീരുമാനിച്ചിട്ടുണ്ട്. കെ.എസ്.ഇ.ബിയുടെ നിർണായക തീരുമാനങ്ങളിൽ ഇനി വകുപ്പ് മന്ത്രിയെ പൂർണമായി വിശ്വാസത്തിലെടുക്കുമെന്ന ഉറപ്പും നൽകിയതായാണ് റിപ്പോർട്ട്. തൽക്കാലം വിവാദത്തിന് ശമനമായെങ്കിലും വൈദ്യുതി വാങ്ങൽ നടപടികളിൽ ഈ ഉറപ്പ് എത്രത്തോളം പാലിക്കപ്പെടുമെന്നതാണ് ഇനി ശ്രദ്ധേയം.
