തിരുവനന്തപുരം: കേരള- തമിഴ്‌നാട് അതിർത്തിയിലെ കളിയിക്കാവിള ചെക്ക് പോസ്റ്റിൽ കളിയിക്കാവിളയിൽ എഎസ്‌ഐയെ വെടിവെച്ച് കൊന്ന കേസിൽ രണ്ട് പേർ കൂടി കസ്റ്റഡിയിൽ.മുഖ്യപ്രതിയായ തൗഫീഖുമായി അടുത്ത ബന്ധമുള്ള രണ്ട് പേരെയാണ് പോലീസ് പിടികൂടിയത്. ഇവർ ഇഞ്ചിവിള സ്വദേശികളാണ് . ഉന്നത പോലീസ് ഉദ്യോഗസ്ഥരുടെ നേതൃത്വത്തിൽ ഇവരെ ചോദ്യം ചെയ്തുവരികയാണ്.
എഎസ്ഐയുടെ കൊലപാതകത്തിന് രണ്ട് ദിവസം മുമ്ബ് പ്രതികളിലൊരാളായ തൗഫീക്കിൻറെ ഫോണിലേക്ക് ഇവരുടെ കോൾ പോയതായി കണ്ടെത്തിയ സാഹചര്യത്തിലാണ് കസ്റ്റഡിയിൽ എടുത്തത്. കൊലപാതകം നടത്താനായി കളിയിക്കാവിളയിലെത്തിയ തൗഫീഖിന് എല്ലാ സൗകര്യങ്ങളും ഒരുക്കി നൽകിയത് ഇവരാണെന്നാണ് സൂചന. തൗഫീഖും അബ്ദുൾ ഷെമീമും ഉൾപ്പെട്ട തീവ്രവാദ സ്വഭാവമുള്ള സംഘടനയുമായി ഇവർക്ക് ബന്ധമുണ്ടോയെന്നും സംശയിക്കുന്നു.
കഴിഞ്ഞ ദിവസം സംസ്ഥാനത്തിൻറെ വിവിധ ഭാഗങ്ങളിലായി നിരവധി പേരെ കസ്റ്റഡിയിലെടുത്തിരുന്നു. ഒട്ടേറെപ്പേരെ വിവിധ ജില്ലകളിലായി ചോദ്യംചെയ്തു വിട്ടയച്ചു. തീവ്രവാദ പ്രസ്ഥാനങ്ങളുമായി ബന്ധമുള്ളവരെയും നേരത്തെ ബന്ധപ്പെട്ടിരുന്നവരെയുമാണു ചോദ്യംചെയ്തത്. ഇതിൽ നാലു പേരെ തമിഴ്‌നാട് ക്യുബ്രാഞ്ചിനു കൈമാറിയതായാണു സൂചന.
