ഭാരതത്തിന്റെ തദ്ദേശീയ പ്രതിരോധ സാങ്കേതികവിദ്യയ്ക്ക് രാജ്യാന്തര തലത്തിൽ ലഭിക്കുന്ന അംഗീകാരത്തിന്റെ പുതിയ ഉദാഹരണമായി ബ്രഹ്മോസ് മിസൈലിനെക്കുറിച്ച് ഫിലിപ്പീൻസ് അംബാസഡർ ജോസൽ ഫ്രാൻസിസ്കോ ഇഗ്നാസിയോ നടത്തിയ പ്രശംസ മാറുകയാണ്. ബ്രഹ്മോസ് മിസൈൽ സംവിധാനത്തിൽ ഫിലിപ്പീൻസ് ഏറെ സംതൃപ്തരാണെന്നും അതിന്റെ പ്രകടനം ശ്രദ്ധേയമാണെന്നുമാണ് അദ്ദേഹം വ്യക്തമാക്കിയത്. 2022-ലാണ് ഭാരതത്തിൽ നിന്ന് ബ്രഹ്മോസ് മിസൈലുകൾ വാങ്ങുന്ന ആദ്യ വിദേശരാജ്യമായി ഫിലിപ്പീൻസ് മാറിയത്. ഇതോടെ ഭാരതത്തിന്റെ പ്രതിരോധ കയറ്റുമതി രംഗത്തും ബ്രഹ്മോസ് നിർണായക സ്ഥാനമാണ് നേടിയത്.
2026-ലെ MASA സൈനിക അഭ്യാസത്തിനിടെ ബ്രഹ്മോസ് സംവിധാനത്തിന്റെ ശേഷി പരീക്ഷിക്കാൻ ഫിലിപ്പീൻസിന് അവസരം ലഭിച്ചു. ചൈനയുമായുള്ള സമുദ്രാതിർത്തി തർക്കങ്ങൾ നിലനിൽക്കുന്ന സാഹചര്യത്തിൽ രാജ്യത്തിന്റെ പ്രതിരോധശേഷി വർധിപ്പിക്കുന്നതിൽ ബ്രഹ്മോസ് നിർണായകമാണെന്നാണ് വിലയിരുത്തൽ. ശബ്ദത്തേക്കാൾ വേഗത്തിൽ സഞ്ചരിക്കുന്ന ഈ ക്രൂയിസ് മിസൈലിന്റെ വേഗതയും കൃത്യതയും ആക്രമണശേഷിയും ഫിലിപ്പീൻസിന്റെ തീരദേശ പ്രതിരോധത്തിന് കൂടുതൽ കരുത്തേകുമെന്നാണ് പ്രതീക്ഷിക്കുന്നത്. അതുകൊണ്ടുതന്നെ ബ്രഹ്മോസിനെ ‘താരതമ്യമില്ലാത്തത്’ എന്ന വിശേഷണത്തോടെയാണ് ഫിലിപ്പീൻസ് വിലയിരുത്തുന്നതെന്നും റിപ്പോർട്ട് വ്യക്തമാക്കുന്നു.
ബ്രഹ്മോസ് മിസൈലിൽ മാത്രം ഒതുങ്ങാതെ ഭാരതവുമായുള്ള പ്രതിരോധ സഹകരണം കൂടുതൽ മേഖലകളിലേക്ക് വ്യാപിപ്പിക്കാനുള്ള സാധ്യതകളും ചർച്ചയാകുന്നുണ്ട്. കൂടുതൽ ബ്രഹ്മോസ് സംവിധാനങ്ങൾ വാങ്ങുന്നതുമായി ബന്ധപ്പെട്ടും മറ്റ് പ്രതിരോധ ഇടപാടുകളെക്കുറിച്ചും ഫിലിപ്പീൻസ് അംബാസഡർ നടത്തിയ പരാമർശങ്ങൾ ശ്രദ്ധേയമാണ്. ഒരുകാലത്ത് പ്രതിരോധ ആവശ്യങ്ങൾക്കായി വിദേശരാജ്യങ്ങളെ ആശ്രയിച്ചിരുന്ന ഇന്ത്യ, ഇന്ന് സ്വന്തം സാങ്കേതികവിദ്യയിലൂടെ സൗഹൃദരാജ്യങ്ങളുടെ സുരക്ഷാ ശേഷി വർധിപ്പിക്കുന്ന പ്രതിരോധ പങ്കാളിയായി മാറുന്നതിന്റെ ഉദാഹരണമായാണ് ഈ സഹകരണം വിലയിരുത്തപ്പെടുന്നത്.
