രാജസ്ഥാൻ: മലയാളി താരം സഞ്ജു വി സാംസണ് ഐപിഎല് 14ാം സീസണില് പുതിയ ഉത്തരവാദിത്തം നൽകാൻ സാധ്യത. രാജസ്ഥാന് റോയല്സിനെ നയിക്കേണ്ട ചുമതല സഞ്ജുവിന് നല്കാനാണ് മാനേജുമെന്റ് ആലോചിക്കുന്നത്. രാജസ്ഥാനെ നന്നയി നയിക്കാൻ ഒരു ഇന്ത്യന് ക്യാപ്റ്റനായിരിക്കും നന്നായി കഴിയുക എന്ന വിലയിരുത്തലിലാണ് രാജസ്ഥാന് ഇത്തരമൊരു നീക്കം നടത്തുന്നതിനെ കുറിച്ച് ആലോചിക്കുന്നത്. ദേശീയ ടീമിലെ ഇനിയുള്ള സഞ്ജുവിന്റെ പ്രകടനം വിലയിരുത്തിയാകും ഇക്കാര്യത്തില് അന്തിമ തീരുമാനം കൈകൊള്ളുക. സഞ്ജുവിനെ പുതിയ ഉത്തരവാദിത്തം ഏല്പിക്കുന്നത് ടീമിനേയും താരത്തിനേയും എങ്ങനെ ബാധിക്കും എന്ന വിലയിരുത്തലാണ് രാജസ്ഥാന് മാനേജുമെന്റ് ഇപ്പോള് നടത്തുന്നത്. നിലവില് ഓസ്ട്രേലിയന് സൂപ്പര് താരം സ്റ്റീവ് സ്മിത്താണ് രാജസ്ഥാന്റെ നായകന്. എന്നാല് രാജസ്ഥാൻ ഇത്തവണയും പ്ലേഓഫ് കാണാതെ പുറത്തായി. ഇതോടെയാണ് ഇന്ത്യന് നായകനെ കുറിച്ചുളള ചര്ച്ച രാജസ്ഥാന് മാനേജുമെന്റിനുളളില് ആരംഭിച്ചത്. കഴിഞ്ഞ ദിവസം മുന് ഇന്ത്യന് താരം ആകാശ് ചോപ്ര ഇന്ത്യന് കളിക്കാരനെ ക്യാപ്റ്റനാക്കാനാണ് രാജസ്ഥാന് റോയല്സ് ലക്ഷ്യം വെക്കുന്നത് എങ്കില് സഞ്ജു സാംസണിനെ പരിഗണിക്കണമെന്ന് ആവശ്യപ്പെട്ടിരുന്നു.