തിരുവനന്തപുരം: വാഹനാപകടത്തില് ഗുരുതരമായി പരിക്കേറ്റ കൊച്ചുവേളി സ്വദേശി 22 കാരിയ്ക്ക് എത്രയും വേഗം സിസേറിയനും സങ്കീര്ണ ന്യൂറോ സര്ജറിയും നടത്തി തിരുവനന്തപുരം സര്ക്കാര് മെഡിക്കല് കോളേജ്.അത്യാഹിത വിഭാഗത്തിലെത്തിച്ച യുവതിയ്ക്കായി അതിവേഗം മള്ട്ടി ഡിസിപ്ലിനറി ടീമിനെ സജ്ജമാക്കിയാണ് അമ്മയേയും കുഞ്ഞിനേയും ജീവിതത്തിലേക്ക് കൊണ്ടുവന്നത്. അമ്മ മെഡിക്കല് കോളേജ് ഐസിയുവിലും കുഞ്ഞ് എസ്.എ.ടി. ആശുപത്രിയിലും തീവ്ര പരിചരണത്തിലാണ്. ഇരുവരുടേയും ആരോഗ്യനില തൃപ്തികരമാണെന്ന് ഡോക്ടര്മാര് അറിയിച്ചു.
മാതൃകാപരമായ സേവനം നടത്തി അമ്മയേയും കുഞ്ഞിനേയും ജീവിതത്തിലേക്ക് കൊണ്ടുവന്ന മുഴുവന് ആരോഗ്യ പ്രവര്ത്തകരേയും ആരോഗ്യ വകുപ്പ് മന്ത്രി വീണാ ജോര്ജ് അഭിനന്ദിച്ചു. മെഡിക്കല് കോളേജില് ആവിഷ്ക്കരിച്ച് നടപ്പിലാക്കിയ ക്വാളിറ്റി ഇംപ്രൂവ്മെന്റ് ഇനിഷേറ്റീവിന്റെ വിജയം കൂടിയാണിത്.
ചെവ്വാഴ്ച രാവിലെയാണ് യുവതിയും ഭര്ത്താവും സഞ്ചരിച്ച ബൈക്ക് ഓട്ടോയുമായി കൂട്ടിയിടിച്ച് അപകടമുണ്ടായത്. ഗുരുതരമായി തലയ്ക്ക് പരിക്കേറ്റ യുവതിയെ ഗര്ഭചികിത്സയ്ക്കായി കാണിച്ചുകൊണ്ടിരുന്ന തലസ്ഥാനത്തെ സ്വകാര്യ ആശുപത്രിയിലെത്തിച്ചു. എന്നാല് പിന്നീട് ബന്ധുക്കള് യുവതിയെ മെഡിക്കല് കോളേജ് ആശുപത്രിയിൽ എത്തിക്കുകയായിരുന്നു.
