നവമാധ്യമങ്ങള്‍ക്ക് ആഘോഷിക്കാന്‍ ഫുട്ബോള്‍ എന്നും രസകരമായ ചില വാര്‍ത്തകളും സംഭവങ്ങളും സംഭാവന ചെയ്യാറുണ്ട്. അത് താരങ്ങളെ കുറിച്ചോ ടീമുകളെ കുറിച്ചോ പരിശീലകരെ കുറിച്ചോ ഒക്കെയുള്ള പലവിധ കാര്യങ്ങളായിരിക്കാം. ആരാധകര്‍ ഉണ്ടാക്കുന്ന വാര്‍ത്തകളും ചില്ലറയല്ല. എന്നാല്‍ ഇക്കുറി ഒരു മാഞ്ചസ്റ്റര്‍ യുണൈറ്റഡിന്‍റെ ഒരു കുട്ടി ആരാധകനാണ് ഫുട്ബോള്‍ ലോകത്തും നവമാധ്യമ ലോകത്തും ഒരുപോലെ തരംഗമായി മാറിക്കൊണ്ടിരിക്കുന്നത്. ഈ പത്ത് വയസുകാരന്‍ ചെയ്ത പണി ഇതാണ്..
കൗണ്ടി ഡോണേഗലില്‍ നിന്നുള്ള കടുത്ത മാഞ്ചസ്റ്റര്‍ യുണൈറ്റഡ് ആരാധകനാണ് ഡാറാ കേര്‍ലി. പത്ത് വയസുകാരനായ ഡാറാ കേര്‍ലി സ്കൂളിലെ അസൈന്‍മെന്‍റിന്‍റെ ഭാഗമായി എഴുതിയ ഒരു കത്താണ് ഇപ്പോള്‍ ഫുട്ബോള്‍ ലോകം ചര്‍ച്ച ചെയ്ത് കൊണ്ടിരിക്കുന്നത്. ലിവര്‍പൂള്‍ എഫ്സിയുടെ 52കാരനായ പരിശീലകന്‍ യുര്‍ഗന്‍ ക്ലോപ്പിനാണ് ഡാറ കത്തയച്ചത്. ഈ കത്തിലെ ഉള്ളടക്കമാണ് ഏറെ കൗതുകമുണര്‍ത്തിയത്.
താന്‍ ഏറെ ആരാധിക്കുന്ന മാഞ്ചസ്റ്റര്‍ യുണൈറ്റഡ് വളരെ മോശം അവസ്ഥയില്‍ നില്‍ക്കുന്നതും, ലിവര്‍പൂളാണെങ്കില്‍ മത്സരങ്ങളെല്ലാം ജയിച്ച് വന്‍ കുതിപ്പ് നടത്തുന്നതുമാണ് ഡാറാ കേര്‍ലിയെ സങ്കടത്തിലാക്കിയത്. ഇനി ശേഷിക്കുന്ന ഒമ്പത് മത്സരങ്ങളും ലിവര്‍പൂള്‍ ജയിച്ചാല്‍ അത് ലീഗിലെ റെക്കോര്‍ഡായി മാറും. അങ്ങനെ വന്നാല്‍ അത് തനിക്ക് വലിയ വിഷമമുണ്ടാക്കും. അതുകൊണ്ട് ലിവര്‍ പൂളിനെ തോല്‍പ്പിക്കാമോ എന്നായിരുന്നു ലിവര്‍പൂളിന്‍റെ കോച്ചിനോടുള്ള കുഞ്ഞ് ആരാധകന്‍റെ ചോദ്യം.
ഇത്തരത്തില്‍ നിരവധി കത്തുകളാണ് ഓരോ ക്ലബ്ബിലേക്കും പ്രതിദിനം എത്തിക്കൊണ്ടിരിക്കുക. എന്നാല്‍ ഈ കത്ത് അത്തരമൊരു കത്തായി കരുതി വിട്ടുകളയാന്‍ ലിവര്‍പൂള്‍ പരിശീലകന്‍ യുര്‍ഗന്‍ ക്ലോപ്പ് തയ്യാറായില്ല. മാഞ്ചസ്റ്റര്‍ യുണൈറ്റഡിന്‍റെ സൂപ്പര്‍ ആരാധകനെ അമ്പരപ്പിച്ച് കൊണ്ട് ക്ലോപ്പ് കത്തിന് മറുപടിക്കത്തയച്ചു. ഈ മറപടിക്കത്ത് വന്നതോടെയാണ് ഡാറാ കേര്‍ലിയും ഡാറയുടെ കത്തും ലോകം ശ്രദ്ധിക്കുന്നത്.
യുണൈറ്റഡിനോടുള്ള ഇഷ്ടം കൊണ്ട് ലിവര്‍പൂള്‍ തോല്‍ക്കണമെന്ന് കേര്‍ലി ആഗ്രഹിക്കുന്നത് പോലെ തന്നെ ലിവര്‍പൂള്‍ ജയിക്കണമെന്ന് ആഗ്രഹിക്കുന്ന അനേക ലക്ഷങ്ങളുമുണ്ട്. അവരെ നിരാശരാക്കാതിരിക്കുക എന്നതാണ് തന്‍റെ ജോലി. ലിവര്‍പൂള്‍ നേരത്തേ തോറ്റിറ്റുണ്ട്. ഭാവിയില്‍ ഇനിയും തോല്‍ക്കും. അതുകൊണ്ട് ഡാറാ കേര്‍ലി വിഷമിക്കാതിരിക്കുക. ഡാറയെ പോലൊരു ആരാധകനെ ലഭിച്ചത് മാഞ്ചസ്റ്റര്‍ യുണൈറ്റഡിന്‍റെ ഭാഗ്യമാണെന്നും ക്ലോപ്പ് കൂട്ടിച്ചേര്‍ത്തു.
മറുപടി ലഭിക്കുമെന്ന് യാതൊരു പ്രതീക്ഷയുമില്ലാതെ, ഒരു അസൈന്‍മെന്‍റിന്‍റെ ഭാഗമായാണ് ഡാറ കേല്‍ലി ക്ലോപ്പിന് കത്തയച്ചത്. എന്നാല്‍ ഡാറയുടെ കത്തിന് മറപടി വന്നതോടെ സംഭവം കളറായി. ട്വിറ്റര്‍ അടക്കമുള്ള നവമാധ്യമങ്ങളില്‍ ഡാറ കേർലിയും കത്തും തരംഗമായി. ഇതോടെ ഫുട്ബോള്‍ ആരാധകര്‍ക്കിടയില്‍ ഒരു കുഞ്ഞ് സ്റ്റാറായിരിക്കുകയാണ് ഡാറാ കേര്‍ലി. സോഷ്യല്‍ മീഡിയ വിഷയം ആഘോഷിക്കുന്നത് ഇങ്ങനെയാണ്..
