വയോജനങ്ങളുടെ അവകാശങ്ങളും സുരക്ഷയും ഉറപ്പാക്കുന്നതിനുള്ള കേരള സീനിയർ സിറ്റിസൺസ് ബിൽ 2026 നിയമസഭ പാസാക്കി. വയോജനങ്ങൾ നേരിടുന്ന പീഡനം, അവഗണന, മാനസിക പീഡനം, സ്വത്ത് തട്ടിയെടുക്കൽ തുടങ്ങിയ പ്രശ്നങ്ങൾക്ക് നിയമപരിരക്ഷ ഉറപ്പാക്കുകയാണ് ബില്ലിന്റെ പ്രധാന ലക്ഷ്യം. വയോജനങ്ങളുടെ അന്തസ്സും സ്വാതന്ത്ര്യവും സംരക്ഷിക്കുന്നതിനൊപ്പം സുരക്ഷിതമായ ജീവിതസാഹചര്യങ്ങൾ ഒരുക്കുന്നതിനും നിയമം ലക്ഷ്യമിടുന്നു.
വയോജനങ്ങളോടുള്ള ക്രൂരതയ്ക്ക് തടവും പിഴയും ഉൾപ്പെടെയുള്ള ശിക്ഷകൾ ബില്ലിൽ വ്യവസ്ഥ ചെയ്യുന്നുണ്ട്. വയോജന പരിചരണ കേന്ദ്രങ്ങളുടെ പ്രവർത്തനങ്ങൾക്ക് നിശ്ചിത മാനദണ്ഡങ്ങൾ ഏർപ്പെടുത്താനും പീഡനങ്ങളും അവഗണനയും സംബന്ധിച്ച പരാതികളിൽ നടപടികൾ സ്വീകരിക്കാനും വ്യവസ്ഥകളുണ്ട്. സൗജന്യ നിയമസഹായം, മെച്ചപ്പെട്ട പരിചരണ സേവനങ്ങൾ, സുരക്ഷിതമായ പൊതുസ്ഥലങ്ങൾ എന്നിവ ഉറപ്പാക്കുന്നതും ബില്ലിന്റെ പ്രധാന ലക്ഷ്യങ്ങളാണ്.
വയോജനങ്ങളുടെ അവകാശങ്ങൾ ഉറപ്പാക്കുന്ന ലോകത്തിലെ ആദ്യ നിയമമാണിതെന്ന് മുഖ്യമന്ത്രി സഭയിൽ അവകാശപ്പെട്ടു. വയോജന സംരക്ഷണത്തിന് സമഗ്രമായ നിയമനിർമാണം നടത്തുന്ന സംസ്ഥാനമെന്ന നിലയിൽ കേരളത്തിന്റെ നടപടി ശ്രദ്ധേയമാണ്. എന്നാൽ നിയമം ഫലപ്രദമായി നടപ്പാക്കുന്നതും വയോജനങ്ങൾക്ക് യഥാർഥത്തിൽ സംരക്ഷണം ലഭിക്കുന്നുണ്ടെന്ന് ഉറപ്പാക്കുന്നതുമാണ് ഇനി പ്രധാനം. ഗവർണറുടെ അംഗീകാരവും തുടർനടപടികളും പൂർത്തിയാകുന്നതോടെ നിയമം പ്രാബല്യത്തിൽ വരും.
