ഹരിത റെയിൽവേയുടെ പുതിയ യുഗം; ഇന്ത്യയിലെ ആദ്യ ഹൈഡ്രജൻ ട്രെയിൻ പ്രധാനമന്ത്രി ഫ്ലാഗ് ഓഫ് ചെയ്തു

ഇന്ത്യൻ റെയിൽവേ ചരിത്രത്തിൽ ഒരു പുതിയ സുവർണ്ണ അധ്യായം കുറിച്ചുകൊണ്ട് രാജ്യത്തെ ആദ്യ ഹൈഡ്രജൻ ഇന്ധന ട്രെയിൻ സർവീസിന് തുടക്കമായി. വടക്കൻ റെയിൽവേയുടെ കീഴിലുള്ള ഹരിയാനയിലെ ജിന്ദ്-സോനിപത് പാതയിലാണ് ഈ ചരിത്ര സർവീസ് ആരംഭിച്ചിരിക്കുന്നത്. പ്രധാനമന്ത്രി നരേന്ദ്ര മോദിയാണ് ഈ അത്യാധുനിക ഹരിത ട്രെയിൻ ഫ്ലാഗ് ഓഫ് ചെയ്തത്. 89 കിലോമീറ്റർ ദൈർഘ്യമുള്ള പാതയിലൂടെയുള്ള ഈ സർവീസ് റെയിൽവേ മേഖലയിലെ കാർബൺ പുറന്തള്ളൽ കുറയ്ക്കുന്നതിനുള്ള ഇന്ത്യയുടെ നിർണ്ണായക ചുവടുവെപ്പാണ്.

ഇന്ത്യയിൽ ഇതാദ്യമായാണ് ട്രെയിൻ സർവീസിനായി ഹൈഡ്രജൻ ഫ്യൂവൽ സെൽ സാങ്കേതികവിദ്യ ഉപയോഗിക്കുന്നത്. ഡീസൽ എൻജിനുകൾക്ക് പകരമായി തികച്ചും പരിസ്ഥിതി സൗഹൃദമായ രീതിയിൽ ഹൈഡ്രജൻ ഉപയോഗിച്ച് വൈദ്യുതി ഉത്പാദിപ്പിച്ചാണ് ഈ ട്രെയിൻ പ്രവർത്തിക്കുന്നത്. ഇതോടൊപ്പം തന്നെ സുരക്ഷിതമായ ഹൈഡ്രജൻ സംഭരണത്തിനും ഇന്ധനം നിറയ്ക്കുന്നതിനുമുള്ള പ്രത്യേക അടിസ്ഥാന സൗകര്യങ്ങളും പദ്ധതിയുടെ ഭാഗമായി ഒരുക്കിയിട്ടുണ്ട്.

ഇത്തരത്തിലുള്ള അതിനൂതന സാങ്കേതികവിദ്യ ഉപയോഗിക്കുന്ന ലോകത്തിലെ മുൻനിര രാജ്യങ്ങളുടെ പട്ടികയിലേക്ക് ഇന്ത്യയും കടന്നിരിക്കുകയാണെന്ന് പ്രധാനമന്ത്രി നരേന്ദ്ര മോദി വ്യക്തമാക്കി. റെയിൽവേയിൽ ഹരിത സാങ്കേതികവിദ്യ പ്രോത്സാഹിപ്പിക്കുന്നതിന് ഈ പരീക്ഷണാത്മക സർവീസ് വലിയ തോതിൽ സഹായിക്കുമെന്നും അദ്ദേഹം കൂട്ടിച്ചേർത്തു.

പത്ത് കോച്ചുകളുള്ള ഈ അത്യാധുനിക ട്രെയിനിൽ 1200 കിലോവാട്ട് ശേഷിയുള്ള ഹൈഡ്രജൻ ഫ്യൂവൽ സെൽ പ്രൊപ്പൽഷൻ സിസ്റ്റമാണ് സജ്ജീകരിച്ചിരിക്കുന്നത്. ഡിസൈൻ അനുസരിച്ച് മണിക്കൂറിൽ 110 കിലോമീറ്റർ വേഗതയിൽ സഞ്ചരിക്കാൻ ശേഷിയുണ്ടെങ്കിലും, സുരക്ഷാ മാനദണ്ഡങ്ങൾ മുൻനിർത്തി നിലവിൽ പരമാവധി 75 കിലോമീറ്റർ വേഗതയിൽ സർവീസ് നടത്താനാണ് അനുമതി നൽകിയിട്ടുള്ളത്.

ഒരേസമയം ഏകദേശം 2,600 യാത്രക്കാരെ വഹിക്കാൻ ശേഷിയുള്ള ഈ ട്രെയിൻ ജിന്ദ് ജംഗ്ഷൻ, ഗോഹാന ജംഗ്ഷൻ, സോനിപത് എന്നിവയെ തമ്മിൽ ബന്ധിപ്പിക്കുന്നു. യാത്രക്കാർക്കായി ജിന്ദ് സിറ്റി, പാണ്ഡു പിണ്ഡാര ജംഗ്ഷൻ, ലളിത് ഖേര ഹാൾട്ട്, ഭാംബേവ, ഇസാപൂർ ഖേരി ഹാൾട്ട്, ബുതാന ഹാൾട്ട്, ഖന്ദ്രായ് ഹാൾട്ട്, റാബ്ര ഹാൾട്ട്, ലാത് ഹാൾട്ട്, മോഹാന, ബർവാസനി ഹാൾട്ട്, സോനിപത് ന്യൂ എന്നീ സ്റ്റേഷനുകളിൽ സ്റ്റോപ്പുകൾ അനുവദിച്ചിട്ടുണ്ട്.

ഈ വിപ്ലവകരമായ ചുവടുവെപ്പിലൂടെ ഹൈഡ്രജൻ ട്രെയിൻ സാങ്കേതികവിദ്യ ഉപയോഗിക്കുന്ന ജർമ്മനി, ജപ്പാൻ, ചൈന, അമേരിക്ക തുടങ്ങിയ വൻശക്തികളുടെ നിരയിലേക്ക് ഇന്ത്യയും എത്തിച്ചേർന്നിരിക്കുകയാണ്. ലോകത്തിലെ ആദ്യത്തെ ഹൈഡ്രജൻ പാസഞ്ചർ ട്രെയിനായ ‘കോറാഡിയ ഐലിന്റ്’ അവതരിപ്പിച്ചത് ജർമ്മനിയാണ്. 2022-ൽ ഒരിക്കൽ പോലും ഇന്ധനം നിറയ്ക്കാതെ 1,175 കിലോമീറ്റർ സഞ്ചരിച്ച് ഈ ട്രെയിൻ ലോക റെക്കോർഡ് സൃഷ്ടിച്ചിരുന്നു. ജപ്പാൻ തങ്ങളുടെ ആദ്യ ഹൈഡ്രജൻ ഹൈബ്രിഡ് ട്രെയിനായ ‘ഹൈബാരി’ വൈകാതെ തന്നെ സർവീസിനായി ഇറക്കുമെന്നാണ് റിപ്പോർട്ടുകൾ. അമേരിക്കയിലെ കാലിഫോർണിയയും ‘സെമു’ എന്ന പേരിൽ ഹൈഡ്രജൻ ട്രെയിൻ ഇതിനോടകം തന്നെ പരീക്ഷിച്ച് കഴിഞ്ഞിട്ടുണ്ട്.