ക്ലിഫ്ഹൗസിൽ താമസിച്ച മുഖ്യമന്ത്രിയല്ലാത്ത നേതാവ് ; ഓർമ്മയിൽ വക്കം പുരുഷോത്തമൻ

തിരുവനന്തപുരം : മുതിർന്ന കോൺഗ്രസ് നേതാവും മുൻ ഗവർണറുമായിരുന്ന വക്കം പുരുഷോത്തമന്റെ വിയോഗത്തിൽ ഞെട്ടലിലാണ് പ്രവർത്തകരും നേതാക്കളും. മന്ത്രിയായും എംപിയായും ഗവർണറായും നിയമസഭാ സ്പീക്കറായുമൊക്ക പ്രാഗത്ഭ്യം തെളിയിച്ച അദ്ദേഹം മുഖ്യ മന്ത്രി പദവിയിലെത്തിയിട്ടില്ല. എങ്കിലും ക്ലിഫ് ഹൗസ് മുഖ്യമന്ത്രിയുടെ ഔദ്യോഗിക വസതിയാക്കി മാറ്റിയ ശേഷം അവിടെ താമസിച്ചിട്ടുള്ള മുഖ്യമന്ത്രിയല്ലാത്ത ഏകവ്യക്തിയാണ് വക്കം പുരുഷോത്തമന്‍. എന്നാല്‍ കുറച്ചുകാലം മുഖ്യമന്ത്രിയുടെ ചുമതലകള്‍ വഹിച്ച അദ്ദേഹം ക്ലിഫ്ഹൗസിലാണ് അന്ന് താമസിച്ചത്. അങ്ങനെയാണ് ചരിത്രത്തിലെ ഒരു അപൂര്‍വ്വമായ പ്രത്യേകത അദ്ദേഹത്തിന് സ്വന്തമായത്.

2006 ജനുവരിയില്‍ വേള്‍ഡ് എക്കണോമിക് ഫോറത്തിന്റെ യോഗത്തില്‍ പങ്കെടുക്കാന്‍ പോയ അന്നത്തെ മുഖ്യമന്ത്രി ഉമ്മന്‍ചാണ്ടിക്ക് സ്വിറ്റ്‌സര്‍ലന്‍ഡിലെ ദാവോസില്‍വച്ച് മഞ്ഞിൽ തെന്നി വീണ് പരിക്കേല്‍ക്കുകയും അദ്ദേഹം ചികിത്സയിലാവുകയും ചെയ്തു. തുടർന്നാണ് മുഖ്യമന്ത്രിയുടെ ചുമതല വക്കത്തിന് കൈമാറുകയും അദ്ദേഹം മുഖ്യമന്ത്രി ആകാതെതന്നെ ക്ലിഫ് ഹൗസില്‍ താമസിക്കുകയും ചെയ്തത്. ഉമ്മന്‍ചാണ്ടി മന്ത്രിസഭയില്‍ ധനകാര്യ-എക്‌സൈസ് വകുപ്പ് മന്ത്രിയായിരുന്നു വക്കം.ഉമ്മന്‍ ചാണ്ടി വിടപറഞ്ഞ് രണ്ടാഴ്ച തികയും മുന്നെയാണ് വക്കവും വിടപറയുന്നത്.

ഭാനു പണിക്കര്‍-ഭവാനി ദമ്പതിമാരുടെ മകനായി 1928 ഏപ്രില്‍ 12-ന് ആറ്റിങ്ങലിലെ വക്കത്താണ് അദ്ദേഹം ജനിക്കുന്നത്. സ്റ്റുഡന്റ്‌സ് കോണ്‍ഗ്രസ് എന്ന വിദ്യാര്‍ഥി സംഘടനയിലൂടെയാണ് പൊതുപ്രവര്‍ത്തന രംഗത്തേക്ക് കടന്നുവരുന്നത്. തിരുവനന്തപുരം ഡിസിസി സെക്രട്ടറി, കെപിസിസി ജനറല്‍ സെക്രട്ടറി, വൈസ് പ്രസിഡന്റ് സ്ഥാനങ്ങളും വഹിച്ചിട്ടുണ്ട്.

ആറ്റിങ്ങല്‍ നിയോജക മണ്ഡലത്തില്‍നിന്ന് 1970,1977,1980,1982, 2001 വര്‍ഷങ്ങളില്‍ നിയമസഭയിലെത്തി. 1971-77, 1980-81, 2001-2004 കാലയളവില്‍ സംസ്ഥാന മന്ത്രിസഭകളിലും അംഗമായി. 1971-77 കാലത്തെ അച്യുതമേനോന്‍ മന്ത്രിസഭയില്‍ വക്കം കൃഷി, തൊഴില്‍ വകുപ്പുകളുടെ ചുമതല വഹിച്ചിരുന്നു. നായനാര്‍ സര്‍ക്കാരില്‍ ആരോഗ്യ, ടൂറിസം മന്ത്രിയായി.

1982-84 കാലത്തും പിന്നീട് 2001 മുതല്‍ 2004 വരെയും അദ്ദേഹം സ്പീക്കര്‍ സ്ഥാനം വഹിച്ചു. 80 കളില്‍ പാര്‍ലമെന്റിലേക്ക് തട്ടകം മാറ്റിയ വക്കം 1984 മുതല്‍ 1991 വരെ ലോക്സഭാംഗമായിരുന്നു. 2004-ലില്‍ ഉമ്മന്‍ ചാണ്ടി മന്ത്രിസഭയില്‍ ധനകാര്യ- എക്സൈസ് വകുപ്പ് മന്ത്രിയായി.

1993-96 കാലത്ത് ആന്‍ഡമാന്‍ ആന്‍ഡ് നിക്കോബാര്‍ ദ്വീപസമൂഹത്തിന്റെ ലെഫ്റ്റനന്റ് ഗവര്‍ണര്‍ ആയിരുന്നു. 2011 മുതല്‍ 2014 വരെ മിസോറം ഗവര്‍ണറായിരുന്നു. 2014 ജൂണ്‍ 30 മുതല്‍ 2014 ജൂലൈ 14 വരെ ത്രിപുരയുടെ ഗവര്‍ണറായി അധിക ചുമതലയും വഹിച്ചിരുന്നു. പ്രമുഖ അഭിഭാഷകനായിരുന്ന അദ്ദേഹത്തെ , ആര്‍.ശങ്കറാണ് കോണ്‍ഗ്രസ് രാഷ്ട്രീയത്തിലേക്കെത്തിക്കുന്നത്.