നടിയെ ആക്രമിച്ച കേസിൽ മൊഴിയെടുക്കാന്‍ നടി കാവ്യ മാധവന് ഇന്ന് പുതിയ നോട്ടിസ് നല്‍കിയേക്കും. സിനിമ മേഖല കേന്ദ്രീകരിച്ചുള്ള 3 പേരുടെ മൊഴിയും ഉടന്‍ രേഖപ്പെടുത്താനാണ് തീരുമാനം. സായ് ശങ്കറിന്റെ ഐ മാക്കിന്റെ ശാസ്ത്രീയ പരിശോധന ഫലം വേഗത്തില്‍ നല്‍കണമെന്ന് ആവശ്യപ്പെട്ട് ക്രൈംബ്രാഞ്ച് കത്ത് നല്‍കി.
നടിയെ ആക്രമിച്ച കേസിന്റെ തുടരന്വേഷണത്തിന്റെ ഭാഗമായിട്ടാണ് നടിയും പ്രതി ദിലീപിന്റെ ഭാര്യയുമായ കാവ്യാമാധവന്റെ മൊഴിയെടുക്കാൻ ക്രൈംബ്രാഞ്ച് തീരുമാനമെടുത്തത്. മുമ്പും കാവ്യക്ക് മൊഴിയെടുക്കാൻ നോട്ടീസ് നൽകിയിരുന്നു. എന്നാൽ ഓരോ സ്ഥലം പറഞ്ഞ് ഒഴിഞ്ഞ് മാറുകയായിരുന്നു. അതുകൊണ്ടു തന്നെ ഉദ്യോഗസ്ഥര്‍ നിര്‍ദേശിക്കുന്ന സ്ഥലത്ത് ഹാജരാകുന്ന വിധം പുതിയ നോട്ടീസ് നല്‍കാനാണ് ഇപ്പോൾ ക്രൈംബ്രാഞ്ച് തീരുമാനിച്ചിരിക്കുന്നത്.
ഇന്നു തന്നെ കാവ്യയ്ക്ക് നോട്ടീസ് നല്‍കിയേക്കും. കാവ്യയുടെ മാതാപിതാക്കളുടെയും അടുത്ത ബന്ധുക്കളുടെയും മൊഴിയെടുക്കാനും അന്വേഷണസംഘം തീരുമാനിച്ചിട്ടുണ്ട്. കാവ്യയുടെയും ദിലീപിന്റെയും സുഹൃത്തുക്കളായ സിനിമ മേഖലയിലുള്ള 3 പേരുടെ മൊഴിയും ഉടന്‍ അന്വേഷണ സംഘം രേഖപ്പെടുത്തും.
