ദില്ലി: എയർ ട്രാഫിക് കൺട്രോളർ ഡ്യൂട്ടിയ്ക്കിടയിൽ ഉത്തേജക മരുന്ന് ഉപയോഗിച്ച സംഭവത്തിൽ അന്വേഷണത്തിന് ഉത്തരവിട്ട് ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ. ഏവിയേഷൻ വകുപ്പിലെ ഉദ്യോഗസ്ഥർ നടത്തിയ പരിശോധനയിലാണ് ഓഫീസർ ഉത്തേജക മരുന്ന് ഉപയോഗിച്ചതായി കണ്ടെത്തിയത്.
മെഡിക്കൽ പരിശോധനയിൽ ഉത്തേജക മരുന്നിന്റെ സാന്നിധ്യം ഉറപ്പിക്കുകയായിരുന്നു. തുടർന്ന് ഇയാളെ ഡ്യൂട്ടിയിൽ നിന്ന് ഒഴിവാക്കാൻ ഡിജിസിഎ ഉത്തരവിട്ടു.
ഡിജിസിഎയുടെ മാർഗനിർദേശ പ്രകാരം ആംഫെറ്റാമൈൻ, കൊക്കയ്ൻ, ഓപിയെറ്റസ്, കഞ്ചാവ്, ബാർബിറ്റിയൂറേറ്റ്സ്, തുടങ്ങിയ പദാർത്ഥങ്ങൾ ഉത്തേജക മരുന്നിന്റെ പട്ടികയിൽ പെടുന്നവയാണ്. അതിനാൽ തന്നെ ഇവയുടെ സാന്നിധ്യം പരിശോധനയിൽ കണ്ടെത്തിയാൽ 2 മണിക്കൂറിനുള്ളിൽ ഡിജിസിഎയിൽ അറിയിക്കണമെന്നതാണ് വ്യവസ്ഥ.
