ദില്ലി: തകര്ന്നു വീണ വ്യോമസേനയുടെ എ.എന്-32 വിമാനത്തിലുണ്ടായിരുന്ന മൂന്ന് മലയാളി സൈനികരടക്കം 13 പേരുടെയും മൃതദേഹം കണ്ടെത്തി. വ്യോമസേനയാണ് ഇക്കാര്യം അറിയിച്ചത്. വിമാനത്തിന്റെബ്ലാക്ബോക്സും കണ്ടെത്തിയിട്ടുണ്ട്. എല്ലാവരുടെയും കുടുംബാംഗങ്ങളെ വിവരം അറിയിച്ചെന്നും വ്യോമസേന വ്യക്തമാക്കി. സൈനികരടങ്ങിയ എട്ടംഗ സംഘമാണ് തെരച്ചില് നടത്തിയത്.
കണ്ണൂര് അഞ്ചരക്കണ്ടി സ്വദേശി കോര്പറല് എന്.കെ. ഷരിന്, കൊല്ലം അഞ്ചല് സ്വദേശി സാര്ജന്റ് അനൂപ് കുമാര്, തൃശൂര് വടക്കാഞ്ചേരി സ്വദേശി സ്ക്വാഡ്രന് ലീഡര് എച്ച്. വിനോദ് എന്നീ മലയാളികളാണ് വിമാനത്തിലുണ്ടായിരുന്നത്.
ജൂണ് മൂന്നിനാണ് വ്യോമസേനയുടെ ആന്റോനോവ് വിമാനം തകര്ന്നുവീണത്. അരുണാചല്പ്രദേശിലെ സിയാങ് ജില്ലയില് ലിപോക്ക് വടക്കു മാറി മലമുകളില് 18,000 അടി ഉയരത്തിലാണ് വിമാനം അപകടത്തില്പെട്ടത്. അസമിലെ ജോര്ഹട്ടില്നിന്ന് അരുണാചല്പ്രദേശിലെ മേച്ചുക്ക വ്യോമതാവളത്തിലേക്ക് പറന്നതാണ് വിമാനം. അരമണിക്കൂറിനുശേഷം റഡാറില്നിന്ന് അപ്രത്യക്ഷ മാകുകയായിരുന്നു.