ആലപ്പുഴ: ഹരിപ്പാടിൽ താറാവുകള് ചത്തത് പക്ഷിപ്പനി മൂലമാണെന്ന് സ്ഥിരീകരിച്ചു. ഇതേത്തുടര്ന്ന് ജില്ലാ കളക്ടര് വി.ആര് കൃഷ്ണതേജയുടെ അധ്യക്ഷതയില് ചേര്ന്ന അടിയന്തര യോഗം ഈ മേഖലകളില് രോഗപ്രതിരോധ നടപടികൾ ഊര്ജിതമാക്കാൻ തീരുമാനിച്ചു.
ഭോപ്പാലിലെ നാഷണല് ഇന്സ്റ്റിറ്റ്യൂട്ട് ഓഫ് ഹൈ സെക്യൂരിറ്റി ആനിമല് ഡിസീസസില് നടത്തിയ പരിശോധനയിലാണ് സാമ്പിളുകളില് എച്ച്5 എന് 1 വൈറസിന്റെ സാന്നിധ്യം കണ്ടെത്തിയിരിക്കുന്നത്.
രോഗം സ്ഥിരീകരിച്ച സ്ഥലങ്ങളുടെ ഒരു കിലോമീറ്റര് ചുറ്റളവിലുള്ള മേഖലയിലെ താറാവുകളെയും മറ്റു പക്ഷികളെയും കൊന്ന് മറവു ചെയ്യുന്നതിനുള്ള നടപടികള് സര്ക്കാര് നിര്ദ്ദേശം ലഭിക്കുന്ന മുറയ്ക്ക് ഉടന് ആരംഭിക്കും.
ഹരിപ്പാട് നഗരസഭയില് പക്ഷിപ്പനി സ്ഥിരീകരിച്ച മേഖലയുടെ ഒരു കിലോമീറ്റര് ചുറ്റളവില് നിന്നും പക്ഷികളെ കൊണ്ടു വരുന്നതും കൊണ്ടു പോകുന്നതും നിരോധിച്ചു. ഇത് കൃത്യമായി നിരീക്ഷിക്കാന് പോലീസ്, റവന്യൂ വകുപ്പ് അധികൃതരെ ചുമതലപ്പെടുത്തി. പക്ഷിപ്പനി മനുഷ്യരിലേക്ക് പകരാതിരിക്കുന്നതിനുള്ള മുന്കരുതല് നടപടി ശക്തമാക്കുന്നതിന് ആരോഗ്യവകുപ്പിന് കളക്ടര് നിര്ദേശം നല്കി.
