കറാച്ചിയിലെ മാരി മാതാ ക്ഷേത്രം തകർത്തതിന് പിന്നാലെ മറ്റൊരു ഹിന്ദു ക്ഷേത്രത്തിന് നേരെറോക്കറ്റ് ലോഞ്ചർ ഉപയോഗിച്ച് ആക്രമണം; പ്രതികൾക്കായി തിരച്ചിൽ

150 വർഷം പഴക്കമുള്ള കറാച്ചിയിലെ മാരി മാതാ ക്ഷേത്രം തകർത്തതിന് പിന്നാലെ പാകിസ്ഥാനിലെ മറ്റൊരു ഹിന്ദു ക്ഷേത്രം കൂടി ആക്രമിക്കപ്പെട്ടു. ഞായറാഴ്ച പുലർച്ചെയാണ് സിന്ധിലെ കാഷ്‌മോറിൽ ഒരു ഹിന്ദു ക്ഷേത്രം “റോക്കറ്റ് ലോഞ്ചറുകൾ” ഉപയോഗിച്ച് ആക്രമിക്കപ്പെട്ടത്.

കൂടാതെ കാഷ്‌മോറിൽ ഘൗസ്പൂർ പോലീസ് സ്റ്റേഷൻ പരിധിയിൽ വരുന്ന ഹിന്ദുക്കളുടെ ക്ഷേത്രവും സമീപത്തെ വീടുകളും ആക്രമിക്കപ്പെട്ടു. ക്ഷേത്രത്തിനും വീടുകൾക്കും നേരെ അക്രമികൾ വെടിയുതിർത്തു. വെടിയൊച്ചയെത്തുടർന്ന് കാഷ്മോർ-കണ്ഡ്കോട്ട് എസ്എസ്പി ഇർഫാൻ സമ്മോയുടെ നേതൃത്വത്തിലുള്ള പോലീസ് യൂണിറ്റ് സ്ഥലത്തെത്തി.

ആരാധനാലയത്തിന് നേരെ അക്രമികൾ റോക്കറ്റ് ലോഞ്ചറുകൾ പ്രയോഗിച്ചതായി പോലീസ് പറഞ്ഞു. ഭാഗ്യവശാൽ, ആക്രമണ സമയത്ത് ക്ഷേത്രം അടച്ചിരുന്നു. ബാഗ്രി സമൂഹം നടത്തുന്ന മതപരമായ സേവനങ്ങൾക്കായി ക്ഷേത്രം വർഷം തോറും തുറക്കാറുണ്ടെന്ന് പോലീസ് ഉദ്യോഗസ്ഥർ പറഞ്ഞു.
ആക്രമണത്തിന് ശേഷം പ്രതികൾ സംഭവസ്ഥലത്ത് നിന്ന് രക്ഷപ്പെട്ടു. പ്രദേശത്ത് പോലീസ് തിരച്ചിൽ തുടരുകയാണ്.