തൃശൂർ: കഴിഞ്ഞ ദിവസം അന്തരിച്ച പ്രസിദ്ധ കവിയും വിവർത്തകനുമായ ആറ്റൂർ രവിവർമയുടെ സംസ്കാരം ഞായറാഴ്ച നടക്കും. രാവിലെ ഒന്പതു മുതൽ 11 വരെ കേരള സാഹിത്യ അക്കാദമിയിൽ പൊതുദർശനത്തിനു വച്ചശേഷം ഉച്ചയ്ക്കു 1.45 ന് പാറമേക്കാവ് ശാന്തിഘട്ടിൽ സംസ്കാരം നടക്കും.
വാർധക്യസഹജമായ അസുഖങ്ങളെതുടർന്ന് ആശുപത്രിയിൽ ചികിത്സയിലായിരുന്ന ആറ്റൂർ രവിവർമ്മ (89) വെള്ളിയാഴ്ച വൈകിട്ടാണ് മരിച്ചത്. ഭാര്യ: ശ്രീദേവി വർമ. മക്കൾ: പ്രവീണ്, നൗഷദ്. റീത്ത. മരുമക്കൾ: ജാനകി, ഷെറിൾ, ശങ്കരവാര്യർ.
എഴുത്തച്ഛൻ പുരസ്കാരം, കേന്ദ്ര സാഹിത്യ അക്കാദമി-കേരള സാഹിത്യ അക്കാദമി അവാർഡുകൾ, ആശാൻ പുരസ്കാരം തുടങ്ങി ഒട്ടേറെ ബഹുമതികൾ നേടിയിട്ടുണ്ട്. എട്ടു പതിറ്റാണ്ടോളം നീണ്ട സാഹിത്യജീവിതത്തിൽ കവിത, ആറ്റൂർ രവിവർമയുടെ കവിതകൾ എന്നീ കവിതാസമാഹാരങ്ങളും, ജെ.ജെ. ചില കുറിപ്പുകൾ, ഒരു പുളിമരത്തിന്റെ കഥ, നാളെ മറ്റൊരു നാൾ തുടങ്ങിയ വിവർത്തന ഗ്രന്ഥങ്ങളും രചിച്ചു. മേഘരൂപനാണ് മറ്റൊരു പ്രശസ്ത കൃതി.
