അയോധ്യാ കേസില് സുപ്രീംകോടതിയുടെ നിര്ണായകമായ വിധി പുറത്തുവന്നു. അയോധ്യയില് ഭൂമിയുടെ അവകാശം ഹിന്ദുക്കള്ക്ക് നല്കിക്കൊണ്ട് ആണ് സുപ്രീം കോടതിയുടെ ചരിത്രപരമായ വിധി. തര്ക്കഭൂമി കേന്ദ്രം ഏറ്റെടുത്ത് ക്ഷേത്രം പണിയാനുള്ള ട്രസ്റ്റിന് മൂന്നു മാസത്തിനകം രൂപം നല്കണം. കേസില് ഹര്ജി നല്കിയിരുന്ന നിര്മോഹി അഖാഡയെ സമിതിയില്(ബോര്ഡ് ഓഫ് ട്രസ്റ്റി) ഉള്പ്പെടുത്തണമെന്നും സുപ്രീം കോടതിയുടെ ഉത്തരവില് പറയുന്നു. മുസ്ലിങ്ങള്ക്കു അയോധ്യയില് തര്ക്കഭൂമിക്കു പുറത്ത് പകരം അഞ്ച് ഏക്കര് ഭൂമി സംസ്ഥാന സര്ക്കാരോ കേന്ദ്രമോ കണ്ടെത്തി നല്കണം.
ചീഫ് ജസ്റ്റിസ് രഞ്ജന് ഗൊഗോയ്, ജസ്റ്റിസുമാരായ എസ്.എ ബോബ്ഡെ, ഡി.വൈ ചന്ദ്രചൂഡ്, അശോക് ഭൂഷണ്, അബ്ദുള് നസീര് എന്നിവരടങ്ങുന്ന ഭരണഘടനാ ബഞ്ചാണ് വിധി പ്രസ്താവിച്ചത്. ഏകകണ്ഠമായിരുന്നു വിധി.
പുരാവസ്തു ഗവേഷണത്തിലൂടെയുള്ള കണ്ടെത്തലുകള് തള്ളിക്കളയാനാവില്ലെന്ന് കോടതി നിരീക്ഷിച്ചു. ബാബറി മസ്ജിദ് പണിതത് തരിശു ഭൂമിയിലല്ല. നേരത്തെ ഉണ്ടായിരുന്ന ഒരു നിര്മിതിയുടെ മുകളിലാണ് ബാബറി മസ്ജിദ് പണിതതെന്നും കോടതി കണ്ടെത്തി.
