തിരുവനന്തപുരം: കാർഗിൽ വിജയ ദിനത്തിൽ ധീര സൈനികരെ അപമാനിക്കാൻ ഇടത് അനുകൂല ബാങ്ക് ജീവനക്കാരുടെ സംഘടനയുടെ ശ്രമം. കാർഗിൽ നുഴഞ്ഞുകയറ്റത്തിന്റെ മുഖ്യ സൂത്രധാരനായ പാകിസ്ഥാൻ മുൻ പ്രസിഡന്റ് പർവേസ് മുഷാറഫിന് സംസ്ഥാന സമ്മേളനത്തിൽ ശ്രദ്ധാഞ്ജലി ഒരുക്കിക്കൊണ്ടാണ് സംഘടന സൈനികരെ അപമാനിക്കാൻ നീക്കം നടത്തിയത്. അഖിലേന്ത്യാ തലത്തിൽ പ്രവർത്തിക്കുന്ന ആൾ ഇന്ത്യ ബാങ്ക് എംപ്ലോയീസ് അസോസിയേഷൻ (എ ഐ ബി ഇ എ) ന്റെ പോഷക ഘടകമായ ബാങ്ക് ഓഫ് ഇന്ത്യ സ്റ്റാഫ് യൂണിയൻ കേരള യുടെ ആലപ്പുഴ സംസ്ഥാന സമ്മേളനത്തിലാണ് പർവേസ് മുഷാറഫിന് ശ്രദ്ധാഞ്ജലി ഒരുക്കിയിരിക്കുന്നത്. ജൂലൈ 27 ന് ആലപ്പുഴ പൊളി ജോർജ്ജ് നഗറിലാണ് ഒരു ദിവസത്തെ സംസ്ഥാന സമ്മേളനം നിശ്ചയിച്ചിരിക്കുന്നത്.
ജൂലൈ 26 നാണ് കാർഗിൽ വിജയത്തിന്റെ ഇരുപത്തിയഞ്ചാം വാർഷികം ആഘോഷിക്കുന്നത്. ഈയവസരത്തിൽ നടക്കുന്ന സംസ്ഥാന സമ്മേളനത്തിൽ മൺമറഞ്ഞുപോയ പ്രശസ്തർക്കൊപ്പം മുഷാറഫിന് ശ്രദ്ധാഞ്ജലിയർപ്പിക്കുന്നത് തീർത്തും അനുചിതവും പ്രകോപനപരവുമാണ്. 1999 ൽ പാക് സൈനികരും ഭീകരവാദികളും കാർഗിലിൽ നുഴഞ്ഞുകയറി പ്രദേശം പിടിച്ചെടുക്കാൻ ശ്രമിക്കുകയായിരുന്നു. എന്നാൽ ശക്തമായ പോരാട്ടത്തിലൂടെ ഇന്ത്യൻ സൈന്യം കാർഗിൽ തിരിച്ചുപിടിക്കുകയായിരുന്നു. ഭാരതത്തിന്റെ ശക്തി ലോകത്തിന് മനസിലാക്കിക്കൊടുത്ത യുദ്ധമായിരുന്നു കാർഗിലിൽ നടന്നത് 527 സൈനികരാണ് മാതൃഭുമിക്കുവേണ്ടി ജീവത്യാഗം ചെയ്തത്. ഈ കടന്നുകയറ്റത്തിന്റെ സൂത്രധാരനായിരുന്നു അന്നത്തെ പാക് പട്ടാള മേധാവിയായിരുന്ന പർവേസ് മുഷറഫ്.
