കോട്ടയത്ത് ബാർ ജീവനക്കാരന് നേരെ വെടിവെപ്പ്; മദ്യപസംഘം ഒളിവില്‍

​കോട്ടയം: ബാർ പ്രവർത്തനസമയം അവസാനിച്ചതിനെച്ചൊല്ലിയുള്ള തർക്കത്തിനൊടുവിൽ ജീവനക്കാരന് നേരെ മദ്യപൻ വെടിയുതിർത്തു. പുതുപ്പള്ളി കൈതേപ്പാലത്തെ ബാറിൽ തിങ്കളാഴ്ച രാത്രി 11 മണിയോടെയാണ് നാടിനെ നടുക്കിയ സംഭവം നടന്നത്. ബാർ അടയ്ക്കുന്ന സമയമായതിനാൽ മദ്യപിച്ചുകൊണ്ടിരുന്ന നാലംഗ സംഘത്തോട് ബില്ലടച്ച് പുറത്തിറങ്ങാൻ ജീവനക്കാരൻ ആവശ്യപ്പെട്ടതാണ് പ്രകോപനത്തിന് കാരണമായത്.

​സമയത്തെ ചൊല്ലിയുണ്ടായ തർക്കം പെട്ടെന്ന് സംഘർഷത്തിലേക്ക് നീങ്ങുകയായിരുന്നു. സംഘത്തിലെ രണ്ടുപേർ ചേർന്ന് ബാർ ജീവനക്കാരനെ കൈയേറ്റം ചെയ്യാൻ ശ്രമിച്ചു. തുടർന്ന് ബാറിൽ നിന്ന് പുറത്തിറങ്ങിയ സംഘത്തിലൊരാൾ പാർക്കിംഗ് ഏരിയയിൽ വെച്ച് ജീവനക്കാരന് നേരെ തോക്കുചൂണ്ടി. കൂടെയുണ്ടായിരുന്നവർ തടയാൻ ശ്രമിച്ചെങ്കിലും ഇയാൾ വെടിയുതിർക്കുകയായിരുന്നു. തലനാരിഴയ്ക്കാണ് ജീവനക്കാരൻ വെടിയേൽക്കാതെ രക്ഷപ്പെട്ടത്.

​സംഭവത്തിന് പിന്നാലെ അക്രമി സംഘം സ്ഥലത്തുനിന്ന് കടന്നുകളഞ്ഞു. എയർ പിസ്റ്റൾ ഉപയോഗിച്ചാണ് വെടിവെച്ചതെന്നാണ് പൊലീസിന്റെ പ്രാഥമിക നിഗമനം. ബാറിലെ വനിതാ ജീവനക്കാരോട് സംഘം മോശമായി പെരുമാറിയതാണ് തർക്കത്തിന് തുടക്കമിട്ടതെന്നും ആരോപണമുണ്ട്. ബാർ മാനേജ്‌മെന്റിന്റെ പരാതിയിൽ ഈസ്റ്റ് പൊലീസ് കേസെടുത്ത് അന്വേഷണം ആരംഭിച്ചു. പ്രതികളെ തിരിച്ചറിഞ്ഞതായും ഇവർക്കായി തിരച്ചിൽ ഊർജിതമാക്കിയതായും പൊലീസ് അറിയിച്ചു.