ബിഹാറിൽ നിതീഷ് കുമാറിന്റെ പിന്തുണ നഷ്ടമായതിന് പിന്നാലെ ചണ്ഡീഗഢ്‌ മുനിസിപ്പല്‍ കോര്‍പറേഷന്‍ തിരഞ്ഞെടുപ്പിലും കാലിടറി ഇൻഡി മുന്നണി. എതിർ സ്ഥാനാർത്ഥി എഎപിയുടെ കുല്‍ദീപ് കുമാറിനെതിരെ 4 വോട്ടുകളുടെ ഭൂരിപക്ഷത്തിൽ ബിജെപിയുടെ മനോജ് കുമാര്‍ സോങ്കര്‍ മേയറായി തെരഞ്ഞെടുക്കപ്പെട്ടു. കുല്‍ദീപ് കുമാറിന് 12 വോട്ടും മനോജ് കുമാര്‍ സോങ്കറിന് 16 വോട്ടും ലഭിച്ചപ്പോള്‍ എട്ട് വോട്ടുകള്‍ അസാധുവായി. കോണ്‍ഗ്രസും എഎപിയും സഖ്യമായി മത്സരിച്ചിട്ടും മേയര്‍ സ്ഥാനം നഷ്ടമായത് ഇൻഡി മുന്നണിയെ ഞെട്ടിച്ചിട്ടുണ്ട്.
35 അംഗ മുനിസിപ്പല്‍ കോര്‍പറേഷനില്‍ എഎപി.-കോണ്‍ഗ്രസ് സഖ്യത്തിന് 20 അംഗങ്ങളും ബിജെപിക്ക് 15 അംഗങ്ങളുമാണുണ്ടായിരുന്നത്. സഖ്യത്തിന് ഭൂരിപക്ഷം ഉറപ്പായിരുന്ന സ്ഥലത്താണ് ബിജെപി അട്ടിമറി വിജയം നേടിയത്.
എക്‌സ് ഒഫീഷ്യോ അംഗമായ കിരണ്‍ ഖേറിന്റെ വോട്ടും മനോജ് കുമാര്‍ സോങ്കറിന് ലഭിച്ചപ്പോൾ എട്ട് പേരുടെ വോട്ട് അസാധുവായി പ്രഖ്യാപിച്ചതിനെതിരെ എഎപി-കോണ്‍ഗ്രസ് അംഗങ്ങള്‍ പ്രതിഷേധിച്ചു. നടപടിക്കെതിരെ പഞ്ചാബ്- ഹരിയാണ ഹൈക്കോടതിയെ സമീപിക്കുമെന്ന് എഎപി. പ്രഖ്യാപിച്ചിരിക്കുകയാണ്. കഴിഞ്ഞ എട്ട് വർഷമായി ബിജെപിയാണ് കോർപ്പറേഷൻ ഭരിക്കുന്നത്.
