പഞ്ചാബ് അതിർത്തിയിൽ പാക് ഡ്രോൺ വെടിവെച്ചിട്ട് ബിഎസ്എഫ് !!നാല് കിലോ ഹെറോയിൻ പിടിച്ചെടുത്തു

പഞ്ചാബ് അതിർത്തിയിൽ ലഹരിവസ്തുക്കളുമായി എത്തിയ പാക് ഡ്രോൺ ബിഎസ്എഫ് വെടിവെച്ചിട്ടു . തൻ തരൺ ജില്ലയിലെ കലിയാൻ അതിർത്തി ഔട്ട്‌പോസ്റ്റിന് സമീപമുള്ള കൃഷിയിടത്തിലാണ് ഡ്രോൺ വെടിവെച്ചിട്ടത്. ഡ്രോണിൽ നിന്ന് 3.925 കിലോഗ്രാം ഹെറോയിൻ പിടിച്ചെടുത്തു. പാകിസ്ഥാൻ കേന്ദ്രീകരിച്ച് പ്രവർത്തിക്കുന്ന ലഹരിക്കടത്തുകാർ ഉപയോഗിച്ച അത്യാധുനിക ‘ഡിജെഐ മാട്രിസ്’ ഡ്രോണും സുരക്ഷാ സേന തകർത്തു. പഞ്ചാബ് പോലീസ് ഡയറക്ടർ ജനറൽ ഗൗരവ് യാദവാണ് ഈ വിവരം പുറത്തുവിട്ടത്.

പഞ്ചാബ് സർക്കാരിന്റെ പുതിയ ആന്റി ഡ്രോൺ സംവിധാനമായ ‘ബാസ് അഖ്’ (Baaz Akh) നൽകിയ മുന്നറിയിപ്പാണ് ഈ വലിയ ലഹരിവേട്ടയ്ക്ക് വഴിയൊരുക്കിയത്. അതിർത്തിയിൽ ഡ്രോണിന്റെ സാന്നിധ്യം തിരിച്ചറിഞ്ഞ ഉടൻ തന്നെ പോലീസ് സംഘം ബിഎസ്എഫിനെ വിവരമറിയിക്കുകയും സംയുക്തമായി നടത്തിയ തെരച്ചിലിൽ ഡ്രോൺ വെടിവെച്ചിടുകയുമായിരുന്നു. ലഹരിമരുന്ന് കൈപ്പറ്റാൻ കാത്തുനിന്ന പ്രാദേശിക ഏജന്റുമാരെയും ഇതിന് പിന്നിലെ വിദേശ കൈകളെയും കണ്ടെത്താനുള്ള അന്വേഷണം ഊർജിതമാക്കിയതായി സീനിയർ സൂപ്രണ്ട് സുരേന്ദ്ര ലാംബ അറിയിച്ചു.

മയക്കുമരുന്നിനും ഗുണ്ടാസംഘങ്ങൾക്കുമെതിരെ പഞ്ചാബ് സർക്കാർ നടത്തുന്ന ‘ഗ്യാങ്സ്റ്റർ തേ വാർ’ എന്ന പ്രത്യേക ഓപ്പറേഷന്റെ ഭാഗമായാണ് ഈ നടപടി. അതിർത്തി കടന്നുള്ള ലഹരിക്കടത്തിന് ഡ്രോണുകൾ വ്യാപകമായി ഉപയോഗിക്കുന്നത് തടയാൻ കഴിഞ്ഞ ഓഗസ്റ്റ് മാസം മുതലാണ് പഞ്ചാബ് സർക്കാർ ‘ബാസ് അഖ്’ എന്ന അത്യാധുനിക നിരീക്ഷണ സംവിധാനം വിന്യസിച്ചത്. ലഹരിമരുന്ന് കടത്തുമായി ബന്ധപ്പെട്ട വിവരങ്ങൾ രഹസ്യമായി നൽകാൻ ആന്റി ഗ്യാങ്സ്റ്റർ ഹെൽപ്പ് ലൈൻ (93946-93946) ഉപയോഗിക്കണമെന്ന് ഡിജിപി ജനങ്ങളോട് അഭ്യർത്ഥിച്ചു.