ദില്ലി : തെരഞ്ഞെടുപ്പ് പെരുമാറ്റചട്ടം ലംഘിച്ച സംഭവത്തിൽ ഫത്തേപൂർ സിക്രി മണ്ഡലത്തിലെ കോൺഗ്രസ് സ്ഥാനാർത്ഥി രാംനാഥ് സികർവാറിനെതിരെയും 70 കൂട്ടാളികൾക്കെതിരെയും പോലീസ് കേസ് രജിസ്റ്റർ ചെയ്തു. അനുമതിയില്ലാതെ റാലി നടത്തിയതിനും മണ്ണുമാന്തി യന്ത്രമുപയോഗിച്ച് പുഷ്പവൃഷ്ടി നടത്തിയതിനുമാണ് കേസ്. സ്ഥാനാർത്ഥി പ്രചാരണം നടത്താനുപയോഗിച്ച മണ്ണുമാന്തി യന്ത്രമുൾപ്പെടെ മുപ്പതോളം വാഹനങ്ങളും പോലീസ് പിടിച്ചെടുത്തു.
രാംനാഥ് സികർവാറിന്റെ പ്രചാരണ റാലിയുടെ ദൃശ്യങ്ങൾ കഴിഞ്ഞ ദിവസം സമൂഹ മാദ്ധ്യമങ്ങളിൽ വൈറലായിരുന്നു. കറുത്ത മഹീന്ദ്ര കാറിന്റെ മേൽക്കൂരയിൽ രാംനാഥ് സികർവാർ ഇരിക്കുന്നതും അനുയായികൾ പുറകിലൂടെ വരുന്ന വാഹനങ്ങളുടെ ബോണറ്റിലും വാതിലിലും ഉൾപ്പെടെ തൂങ്ങിക്കിടക്കുന്നതുമാണ് വീഡിയോയിൽ കാണാനാകുന്നത്. റാലി നടത്താനും വാഹനങ്ങൾ ഉപയോഗിക്കാനും രാംനാഥിന് റിട്ടേണിംഗ് ഓഫീസറുടെ അനുമതി ലഭിച്ചിരുന്നില്ല.
