ഒട്ടാവ:കുപ്രസിദ്ധ അധോലോക സംഘത്തലവൻ ലോറൻസ് ബിഷ്ണോയിയെയും കൂട്ടാളികളെയും കാനഡ തങ്ങളുടെ ക്രിമിനൽ കോഡ് പ്രകാരം ‘ഭീകര സംഘടന’യായി പ്രഖ്യാപിച്ചു. കൊലപാതകം, ഭീഷണിപ്പെടുത്തി പണം തട്ടൽ, ആയുധക്കടത്ത്, മയക്കുമരുന്ന് കടത്ത് തുടങ്ങിയ കുറ്റകൃത്യങ്ങളിലൂടെ ഇന്ത്യയിലും വിദേശത്തും കുപ്രസിദ്ധി നേടിയ സംഘമാണിത്. പബ്ലിക് സേഫ്റ്റി മന്ത്രി ഗാരി ആനന്ദസാംഗ്രീയാണ് ഇന്ന് വൈകുന്നേരം ഈ സുപ്രധാന പ്രഖ്യാപനം നടത്തിയത്.
ഈ നടപടിയോടെ, ബിഷ്ണോയി സംഘത്തിന് കാനഡയിലുള്ള പണം, വാഹനങ്ങൾ, വസ്തുവകകൾ തുടങ്ങിയ എല്ലാ ആസ്തികളും മരവിപ്പിക്കാനോ കണ്ടുകെട്ടാനോ കനേഡിയൻ സർക്കാരിന് അധികാരമുണ്ടാകും. ഭീകരപ്രവർത്തനങ്ങൾക്കുള്ള ധനസഹായം ഉൾപ്പെടെയുള്ള കുറ്റകൃത്യങ്ങൾക്ക് സംഘാംഗങ്ങൾക്കെതിരെ കൂടുതൽ ശക്തമായ നിയമനടപടികൾ സ്വീകരിക്കാൻ ഇത് കനേഡിയൻ നിയമപാലകർക്ക് അധികാരം നൽകും. കൂടാതെ, സംശയിക്കപ്പെടുന്ന സംഘാംഗങ്ങൾക്ക് കാനഡയിലേക്കുള്ള പ്രവേശനാനുമതി കുടിയേറ്റ ഉദ്യോഗസ്ഥർക്ക് നിഷേധിക്കാനും കഴിയും.
കനേഡിയൻ നിയമപ്രകാരം, ബിഷ്ണോയി സംഘത്തിൻ്റെ ഉടമസ്ഥതയിലുള്ളതോ നിയന്ത്രണത്തിലുള്ളതോ ആയ സ്വത്തുക്കളുമായി അറിഞ്ഞുകൊണ്ട് ഇടപാടുകൾ നടത്തുന്നത് കനേഡിയൻ പൗരന്മാർക്കും വിദേശത്തുള്ളവർക്കും ഇനി ക്രിമിനൽ കുറ്റമാകും. സംഘത്തിന് നേരിട്ടോ അല്ലാതെയോ പ്രയോജനകരമാകുന്ന രീതിയിൽ സ്വത്തുക്കൾ കൈമാറ്റം ചെയ്യുന്നതും ക്രിമിനൽ കുറ്റമായി കണക്കാക്കും.
മുൻ പ്രധാനമന്ത്രി ജസ്റ്റിൻ ട്രൂഡോയുടെ ഭരണത്തിൻ്റെ അവസാന മാസങ്ങളിൽ വഷളായ ഇന്ത്യ-കാനഡ നയതന്ത്ര ബന്ധം മെച്ചപ്പെടുത്തുന്നതിനുള്ള ഒരു സുപ്രധാന ചുവടുവെപ്പായാണ് ഈ പ്രഖ്യാപനം വിലയിരുത്തപ്പെടുന്നത്.
ബിഷ്ണോയി സംഘത്തെ ഭീകരന്മാരായി പ്രഖ്യാപിക്കണമെന്ന് കനേഡിയൻ എം.പി. ഫ്രാങ്ക് കാപ്പുട്ടോ ഒരു മാസം മുമ്പ് മന്ത്രി ആനന്ദസാംഗ്രീയോട് ആവശ്യപ്പെട്ടിരുന്നു. കാനഡയിലെ സിഖ് ജനസംഖ്യയുടെ 20 ശതമാനത്തോളം താമസിക്കുന്ന ബ്രാംപ്ടൺ മേയർ പാട്രിക് ബ്രൗൺ ഉൾപ്പെടെയുള്ള മറ്റ് നാല് കനേഡിയൻ രാഷ്ട്രീയ നേതാക്കളും ബിഷ്ണോയി സംഘത്തിനെതിരെ നടപടിയെടുക്കാൻ ആവശ്യപ്പെട്ടിരുന്നു.
ആയുധ-മയക്കുമരുന്ന് കടത്തുമായി ബന്ധമുള്ള ഏറ്റവും കുപ്രസിദ്ധമായ ക്രിമിനൽ സിൻഡിക്കേറ്റുകളിൽ ഒന്നായാണ് കനേഡിയൻ സർക്കാർ ബിഷ്ണോയി സംഘത്തെ കണക്കാക്കുന്നത്. 2022 മെയ് മാസത്തിൽ പ്രശസ്ത പഞ്ചാബി ഗായകൻ സിദ്ധു മൂസെ വാലയുടെ കൊലപാതകത്തിന് ശേഷം ഈ സംഘം നിരവധി കൊലപാതകങ്ങളുമായി ബന്ധപ്പെട്ടിരിന്നു.
2023 ഡിസംബറിൽ രജപുത്ര നേതാവ് സുഖ്ദേവ് ഗോഗാമേദിയുടെ കൊലപാതകം, 2024 ഒക്ടോബറിൽ മഹാരാഷ്ട്ര രാഷ്ട്രീയ നേതാവ് ബാബ സിദ്ദിഖിയുടെ കൊലപാതകം, 1999-ലെ കൃഷ്ണമൃഗവേട്ട കേസിൻ്റെ പേരിൽ ബോളിവുഡ് താരം സൽമാൻ ഖാനെ ലക്ഷ്യമിട്ട് 2025 ഏപ്രിലിൽ അദ്ദേഹത്തിന്റെ വീടിന് പുറത്ത് നടന്ന വെടിവെയ്പ്പ് എന്നിവയിൽ സംഘത്തിന് ബന്ധമുണ്ട്.
എങ്കിലും, ഖലിസ്ഥാൻ അനുകൂലിയായിരുന്ന കനേഡിയൻ പൗരൻ ഹർദീപ് നിജ്ജാറിൻ്റെ 2023 ജൂണിലെ കൊലപാതകമാണ് ബിഷ്ണോയി സംഘത്തിന് അന്താരാഷ്ട്ര ശ്രദ്ധ നേടിക്കൊടുത്തത്. നിജ്ജാറിൻ്റെ കൊലപാതകം ഇന്ത്യയും കാനഡയും തമ്മിൽ വലിയ നയതന്ത്ര തർക്കത്തിന് കാരണമായിരുന്നു. ഈ കൊലപാതകത്തിൽ ഇന്ത്യാ ഗവൺമെന്റിന് പങ്കുണ്ടെന്ന് തെളിവുകളില്ലാതെ ട്രൂഡോ ആരോപിച്ചിരുന്നു. ഈ ആരോപണങ്ങൾ ഇന്ത്യ തള്ളിക്കളയുകയും ഖലിസ്ഥാൻ ഭീകരരുടെ വോട്ട് ബാങ്കിനായി ട്രൂഡോ പ്രവർത്തിക്കുകയാണെന്ന് തിരിച്ചാരോപിക്കുകയും ചെയ്തിരുന്നു. ഗോൾഡി ബ്രാർ എന്ന കൂട്ടാളിയുമായി ലോറൻസ് ബിഷ്ണോയി ജൂണിൽ വേർപിരിഞ്ഞതായും റിപ്പോർട്ടുകളുണ്ട്.’
