തിരുപ്പതി വെങ്കിടേശ്വര ക്ഷേത്രത്തിലെ പ്രസിദ്ധമായ ലഡ്ഡു പ്രസാദ നിര്മ്മാണത്തിന് ഉപയോഗിച്ച നെയ്യില് മായം കലര്ത്തിയെന്ന കേസില് എന്ഫോഴ്സ്മെന്റ് ഡയറക്റ്ററേറ്റ് (ED) നടത്തുന്ന അന്വേഷണം നിര്ണായക ഘട്ടത്തിലേക്ക് എത്തിയിരിക്കുകയാണ്. ‘സുകൃതി ഫുഡ്സ്’ (Sukriti Foods) പ്രൊമോട്ടറായ കൈലാഷ് ചന്ദ് മംഗ്ലയെ ഹൈദരാബാദ് ഇ.ഡി സംഘം അറസ്റ്റ് ചെയ്തതോടെ, ദക്ഷിണേന്ത്യയെ ഇളക്കിമറിച്ച ഈ അഴിമതിയുടെ ഭീകരമായ വ്യാപ്തിയാണ് പുറത്തുവരുന്നത്.
2019 മുതല് 2024 വരെയുള്ള കാലയളവില് തിരുമല തിരുപ്പതി ദേവസ്ഥാനത്തിന് (TTD) വിതരണം ചെയ്ത നെയ്യിലാണ് വന്തോതില് മായം കലര്ത്തിയതായി ഇ.ഡി കണ്ടെത്തിയത്. ‘അഗ്മാര്ക്ക് സ്പെഷ്യല് ഗ്രേഡ് പശുവിന് നെയ്യ്’ എന്ന വ്യാജേന വിതരണം ചെയ്തതില് ശുദ്ധമായ പശുവിന് പാല് കൊഴുപ്പ് വളരെ കുറവായിരുന്നു. ശുദ്ധീകരിച്ച പാം ഓയില് (Refined Palm Oil), പാം കേര്ണല് ഓയില്, പാം ഒലീന് എന്നീ എണ്ണകള് ആയിരുന്നു ഉണ്ടായിരുന്നത്. MG-90, മൈവാസെറ്റ് സോഫ്റ്റ് 400 (Myvacet Soft 400), മോണോഗ്ലിസറൈഡുകള് (Monoglycerides), അസറ്റിക് ആസിഡ് എസ്റ്റര് (Acetic Acid Ester) എന്നീ രാസവസ്തുക്കളും ലഡുവില് ചേര്ത്തിരുന്നു. ഭക്തരുടെ വിശ്വാസത്തെ ചൂഷണം ചെയ്തുകൊണ്ട് തികച്ചും വ്യാവസായിക രാസവസ്തുക്കളും വിലകുറഞ്ഞ എണ്ണകളും ചേര്ത്താണ് പ്രസാദത്തിനുള്ള നെയ്യ് ഉണ്ടാക്കിയതെന്ന് അന്വേഷണത്തില് തെളിഞ്ഞു.
ഇ.ഡി കണക്കാക്കുന്നതനുസരിച്ച് ഏകദേശം 230 കോടി രൂപയുടെ നെയ്യ് വിതരണമാണ് ഈ കാലയളവില് സംശയനിഴലില് നിലനില്ക്കുന്നത്. അറസ്റ്റിലായ കൈലാഷ് ചന്ദ് മംഗ്ലയുടെ ഫാക്ടറിയില് മാത്രം നിര്മ്മിച്ചത് ഏകദേശം 96 കോടി രൂപയുടെ വ്യാജ നെയ്യാണ്. പാം ഓയില് വാങ്ങിയതും അതിലൂടെ രാസവസ്തുക്കള് ചേര്ത്ത് നെയ്യ് നിര്മ്മിച്ചതും മറച്ചുവെക്കാന് കൃത്രിമ വില്പ്പന/വാങ്ങല് രേഖകള് ചമച്ചതായും തെളിഞ്ഞു. വിപണിയിലേക്ക് വ്യാജ നെയ്യ് എത്തിക്കാന് ശ്രീ വൈഷ്ണവി ഡയറി സ്പെഷ്യാലിറ്റീസ്, മാല്ഗംഗ മില്ക്ക് & അഗ്രോ പ്രോഡക്ട്സ്, എ.ആര്. ഡയറി ഫുഡ്സ് തുടങ്ങിയ കമ്പനികളെ ഇടനിലക്കാരായി ഉപയോഗിച്ചു.
ഈ കേസുമായി ബന്ധപ്പെട്ട് മുന്പ് ‘ഭോലെ ബാബ ഓര്ഗാനിക് ഡയറി മില്ക്’ പ്രൊമോട്ടര് വിപിന് ജെയിനെയും ഇ.ഡി അറസ്റ്റ് ചെയ്തിരുന്നു. കള്ളപ്പണം വെളുപ്പിക്കല് തടയല് നിയമപ്രകാരം (PMLA) വിശാഖപട്ടണത്തെ പ്രത്യേക കോടതിയില് ഹാജരാക്കിയ മംഗ്ലയെ നിലവില് ജുഡീഷ്യല് കസ്റ്റഡിയില് വിട്ടിരിക്കുകയാണ്. തട്ടിപ്പിലൂടെ സമ്പാദിച്ച കോടിക്കണക്കിന് രൂപയുടെ സാമ്പത്തിക ഇടപാടുകളെക്കുറിച്ചുള്ള (Money Trail) അന്വേഷണം ശക്തമായി മുന്നോട്ടുപോകുകയാണ്.
