കണ്ണൂര്‍ കൂത്തുപറമ്പിൽ വാഹനാപകടം; 8 വയസുകാരനടക്കം രണ്ട് മരണം, 7 പേർക്ക് പരിക്ക്

കണ്ണൂര്‍: കൂത്തുപറമ്പ് മെരുവമ്പായിയിൽ ടവേര കാര്‍ കലുങ്കിൽ ഇടിച്ച് മറിഞ്ഞ് 8 വയസുകാരനടക്കം രണ്ട് പേർ മരിച്ചു. ഉരുവച്ചാൽ കയനി സ്വദേശികളായ അരവിന്ദാക്ഷൻ (65), ഷാരോൺ (8) എന്നിവരാണ് മരിച്ചത്. അപകടത്തില്‍ ഏഴ് പേർക്ക് പരിക്കേറ്റു. കോഴിക്കോട് എയർപോർട്ടിൽ നിന്നും ഉരുവച്ചാൽ കയനിയിലേക്ക് പോകുന്ന കുടുംബം സഞ്ചരിച്ച വാഹനമാണ് അപകടത്തിൽപ്പെട്ടത്.

അതേസമയം, കോഴിക്കോട് താമരശ്ശേരി തച്ചംപൊയിലിൽ നിയന്ത്രണം വിട്ട പിക്കപ്പ് വാൻ കടയിലേക്ക് ഇടിച്ചുകയറി. നാല് സ്കൂട്ടറുകളിലും കാറിലും ഇടിച്ചായിരുന്നു പിക്കപ്പ് കടയിലേക്ക് ഇടിച്ചുകയറിയത്. റോഡരികിൽ നിൽക്കുകയായിരുന്ന ഒരാൾക്ക് പരിക്കേറ്റു. തച്ചംപൊയിൽ നെരോംപാറമ്മൽ വിജയനാണ് പരിക്കേറ്റത്. ഇയാളുടെ നില ഗുരുതരമല്ല. ബാലുശ്ശേരി ഭാഗത്ത് നിന്നും വന്ന പിക്കപ്പാണ് നിയന്ത്രണം വിട്ട് അപകടത്തിൽപ്പെട്ടത്.