ദില്ലി: ആള്ക്കൂട്ട കൊലപാതകങ്ങള് തടയാനുള്ള നിയമം അവതരിപ്പിക്കാനൊരുങ്ങി കേന്ദ്രസര്ക്കാര്. രാജ്യത്ത് ആള്കൂട്ട കൊലപാതകങ്ങള് വര്ധിച്ചുവരുന്നതില് ആശങ്ക പ്രകടിപ്പിച്ച് നിയമം കൊണ്ടുവരാന് കേന്ദ്രസര്ക്കാരിനോട് സുപ്രീം കോടതി നിര്ദ്ദേശിച്ചിരുന്നു. ഇതനുസരിച്ച് തയ്യാറാക്കിയ ബില്ലാണ് കേന്ദ്രസര്ക്കാര് നടപ്പുസമ്മേളനത്തില് പാര്ലമെന്റില് അവതരിപ്പിക്കാന് തയ്യാറെടുക്കുന്നത്.
വിഷയം പഠിച്ച് നിയമത്തിന്റെ കരട് തയ്യാറാക്കണമെന്ന് ആഭ്യന്തര മന്ത്രാലയം നിയമ മന്ത്രാലയത്തിനോട് ആവശ്യപ്പെട്ടിരുന്നു. സമൂഹമാധ്യമങ്ങളിലൂടെ പടരുന്ന സന്ദേശങ്ങളാണ് പലപ്പോഴും ആള്ക്കൂട്ട കൊലപാതകങ്ങളിലേക്ക് നീങ്ങുന്നത്. 20 കോടി ആളുകളാണ് രാജ്യത്ത് സമൂഹമാധ്യമങ്ങള് വ്യാപകമായി ഉപയോഗിക്കുന്നത്. ഇക്കാര്യങ്ങള് ശ്രദ്ധയോടെ പഠിച്ച് നിയമം തയ്യാറാക്കണമെന്നാണ് നിയമമന്ത്രാലയത്തോട് ആവശ്യപ്പെട്ടിരിക്കുന്നത്.
കഴിഞ്ഞ രണ്ടുവര്ഷത്തിനിടെ ഏറ്റവും കൂടുതല് ആള്കൂട്ട മര്ദ്ദനം റിപ്പോര്ട്ട് ചെയ്യപ്പെട്ടിട്ടുള്ളത് രാജസ്ഥാനിലാണ്. വിഷയത്തില് നിയമം കൊണ്ടുവരുമെന്ന് രാജസ്ഥാന് സര്ക്കാര് പറഞ്ഞിരുന്നു. ഉത്തര് പ്രദേശില് ആള്കൂട്ട കൊലപാതകത്തിനെതിരായ നിയമത്തിന്റെ കരട് പൊതുജനാഭിപ്രായത്തിനായി ഈ മാസം ആദ്യം പ്രസിദ്ധീകരിച്ചിരുന്നു. ആള്കൂട്ട മര്ദ്ദനത്തില് ഏര്പ്പെടുന്നവര്ക്ക് ജീവപര്യന്തം തടവ് ശിക്ഷ വ്യവസ്ഥ ചെയ്യുന്ന ബില്ലാണ് ഉത്തര്പ്രദേശ് വിഭാവനം ചെയ്തിരിക്കുന്നത്.
