ഭക്തർക്ക് അനുഗ്രഹവർഷമായി ചെങ്ങന്നൂർ ദേവിയുടെ തൃപ്പൂത്താറാട്ട് ശനിയാഴ്ച

ചെങ്ങന്നൂർ: ചെങ്ങന്നൂർ ഭഗവതി തൃപ്പൂത്തായി. തൃപ്പൂത്താറാട്ട് ശനിയാഴ്ച രാവിലെ ക്ഷേത്രത്തിന് സമീപമുള്ള പമ്പാ നദിയിലെ മിത്രപ്പുഴക്കടവിൽ നടക്കും. ഈ മലയാള വർഷം ആദ്യത്തെ തൃപ്പൂത്താറാട്ടെന്ന നിലയിൽ ശനിയാഴ്ച്ചത്തെ ചടങ്ങുകൾക്ക് ഏറെ പ്രാധാന്യവും പ്രത്യേകതകളും ഉണ്ട്. ആയിരക്കണക്കിന് ഭക്തരെയാണ് ചടങ്ങിനായി ക്ഷേത്രഭാരവാഹികൾ പ്രതീക്ഷിക്കുന്നത്.

എണ്ണ, തേന്‍, മഞ്ഞള്‍പ്പൊടി, പനിനീര്, കൂവപ്പൊടി, പാല്‍ തുടങ്ങിയവ അഭിഷേകം ചെയ്തശേഷം തന്ത്രിയും സഹകാര്‍മ്മികരും ദേവീബിംബവുമായി പമ്പയില്‍ മൂന്നുതവണ മുങ്ങുന്നതാണ് ആറാട്ട് ചടങ്ങ്. തുടർന്ന് കടവില്‍ പട്ടും ഹാരവും ധരിച്ചൊരുങ്ങി തിരികെയെത്തുന്ന ദേവിയെ ക്ഷേത്രാങ്കണത്തിൽ മഹാദേവന്‍ സ്വീകരിക്കും. ആറാട്ടിന് ശേഷം ക്ഷേത്രത്തിലേക്ക് എഴുന്നെള്ളുന്ന ദേവിയെ യുവതികളും ബാലികമാരും താലപ്പൊലിയുമായി അനുഗമിക്കും.

തുടർന്ന് അകത്തെഴുന്നള്ളിച്ചശേഷം ദേവീദേവൻമാർക്ക് കളഭാഭിഷേകം നടത്തും. അതുകഴിഞ്ഞാണ് തിരുവാഭരണച്ചാർത്ത്. അടിയുറച്ച ഭക്തിവിശ്വാസങ്ങളുടെ നിറവിൽ കേണൽ മൺറോ ചെങ്ങന്നൂർ മഹാദേവ ക്ഷേത്രത്തിൽ സമർപ്പിച്ച തിരുവാഭരണങ്ങൾ ദേവിക്ക് ചാർത്തും.

തിരുവാഭരണങ്ങൾ ആറന്മുളയിലെ ദേവസ്വം സ്‌ട്രോങ്‌റൂമിലാണ് സൂക്ഷിക്കുന്നത്. വൈകീട്ട് ദീപാരാധന സമയത്തും തിരുവാഭരണങ്ങൾ ചാർത്തും. മലയാളമാസത്തിലെ ആദ്യത്തെ തൃപ്പൂത്താറാണ്ട് ചിലവ് കേണൽ മൺറോയുടെ വകയാണ്. പണ്ട് മണ്‍റോ സായിപ്പ് തൃപ്പൂത്താറാട്ടിന്‍റെ ചെലവുകള്‍ വെട്ടിക്കുറച്ചു. തുടര്‍ന്ന് സായിപ്പിന്റെ ഭാര്യക്ക് രക്തസ്രാവമുൾപ്പെടെ തുടര്‍ച്ചയായി നിരവധി രോഗങ്ങൾ ഉണ്ടായി.

പ്രശ്‌നചിന്തയില്‍ ദേവീകോപം കൊണ്ടാണ് ഇങ്ങനെ സംഭവിക്കുന്നതെന്ന് തിരിച്ചറിഞ്ഞ കേണൽ മൺറോ വെട്ടിക്കുറച്ച തൃപ്പൂത്താറാട്ട് ചെലവുകള്‍ പുനസ്ഥാപിച്ചു. പ്രായശ്ചിത്തമായി തിരുവാഭരണങ്ങള്‍ ദേവിക്ക് സമര്‍പ്പിച്ചു. വര്‍ഷാദ്യ തൃപ്പൂത്തിന്‍റെ ചെലവിനായി ഒരുതുക കേണൽ മൺറോ ദേവസ്വത്തില്‍ നിക്ഷേപിച്ചു. ഈ തുക ഉപയോഗിച്ചാണ് ഇപ്പോഴും മലയാളമാസത്തിലെ ആദ്യ തൃപ്പൂത്താറാട്ട് നടത്തുന്നത്. കേണൽ മൺറോ ഇത് സംബന്ധിച്ച നൽകിയ രേഖകൾ ഇന്നും ദേവസ്വം റെക്കോഡുകളിൽ ഉണ്ട്.