കോഴിക്കോട്: കഴിഞ്ഞ ദിവസം കണ്ടെത്തിയ ചില്ഡ്രന്സ് ഹോമിലെ ആറു പെണ്കുട്ടികളില് ഒരാള് കൈമുറിച്ചു. പൊലീസും ചില്ഡ്രന്സ് ഹോമിലെ ജീവനക്കാരും ചേര്ന്ന് പെണ്കുട്ടിയെ ആശുപത്രിയിലെത്തിച്ച് പ്രഥമ ശ്രൂശ്രൂഷ നല്കി.
എന്നാൽ ഇത് ആത്മഹത്യാശ്രമമായി കണക്കാക്കാനാകില്ലെന്ന് പൊലീസ് പറയുന്നു. ഇന്നലെയാണ് പെൺകുട്ടികളെ മലപ്പുറം, ബംഗളൂരു എന്നിവിടങ്ങളില് നിന്ന് കണ്ടെത്തി കോഴിക്കോട്ട് തിരിച്ചെത്തിച്ചത്. തുടർന്ന് പെണ്കുട്ടികളുടെ മൊഴിയെടുത്ത ശേഷമാണ് ചില്ഡ്രന്സ് ഹോമിലേക്ക് തന്നെ തിരികെ കൊണ്ടുപോയത്. പിന്നാലെ രാത്രിയാണ് പെൺകുട്ടി ആത്മഹത്യയ്ക്ക് ശ്രമിച്ചത്.
അതേസമയം ചില്ഡ്രന്സ് ഹോമിലേക്ക് തിരികെ പോകാന് താത്പര്യമില്ലെന്ന് കുട്ടികള് പൊലീസിനോട് പറഞ്ഞതായാണ് റിപ്പോര്ട്ടുകള്. ചില്ഡ്രന്സ് ഹോമിൽ സ്വാതന്ത്ര്യമില്ലെന്നും ഇവിടെ നില്ക്കാന് ബുദ്ധിമുട്ടാണെന്നും കുട്ടികള് പറഞ്ഞു. ഇതേതുടര്ന്ന് ചില്ഡ്രന്സ് ഹോമില് തിരികെ എത്തിയത് മുതല് കുട്ടികള് ബഹളം വച്ച് പ്രതിഷേധിച്ചതായാണ് റിപ്പോര്ട്ട്.
ഇതിന് പിന്നാലെ കഴിഞ്ഞ ദിവസം രാത്രി കുട്ടികള് താമസിക്കുന്ന മുറിയില് ജനലിന്റെ ചില്ല് തകര്ത്താണ് ഒരു കുട്ടി കൈമുറിച്ചത്. ഉടനെ തന്നെ പെൺകുട്ടിയെ ആശുപത്രിയിലേക്ക് കൊണ്ടുപോയി. പ്രഥമ ശ്രൂശ്രൂഷയ്ക്ക് ശേഷം കുട്ടിയെ വീണ്ടും ചില്ഡ്രന്സ് ഹോമിലേക്ക് തന്നെ തിരികെ കൊണ്ടുവന്നു. എന്നാൽ ഇത് ആത്മഹത്യാശ്രമമായി കണക്കാക്കാനാകില്ലെന്നാണ് പൊലീസ് പറയുന്നത്.
