കണ്ണൂർ: സിഐടിയു രാജിൽ സംസ്ഥാനത്ത് ഒരു സ്ഥാപനം കൂടി പൂട്ടിക്കെട്ടി(CITU Strike In Kerala). കണ്ണൂരിലാണ് സംഭവം. മാടായി തെരുവിലെ ശ്രീ പോർക്കലി സ്റ്റീൽസ് എന്ന ഹാർഡ് വെയർ സ്ഥാപനമാണ് തൊഴിൽ സമരത്തെ തുടർന്ന് അടച്ചത്. ഒന്നര മാസത്തിലേറെയായി സി.ഐ.ടി.യു കടയ്ക്ക് മുന്നിൽ കൊടികുത്തി സമരം നടത്തി വരികയാണ്. തൊഴില് നിഷേധിച്ചു എന്നാരോപിച്ചാണ് പന്തല് കെട്ടി കൊടി നാട്ടി സമരം ആരംഭിച്ചത്.
അതേസമയം സിഐടിയു നേതാക്കളുടെ ഭീഷണി മൂലമാണ് സ്ഥാപനം അടച്ചു പൂട്ടുന്നതെന്ന് കടയുടമ പറഞ്ഞു. കണ്ണൂര് മാതമംഗലത്ത് സി.ഐ.ടിയു സമരത്തെത്തുടര്ന്ന് ഹാര്ഡ് വേര് സ്ഥാപനം അടച്ചു പൂട്ടിയത് ഏറെ വിവാദമായതിനു പിന്നാലെയാണ് തൊഴില് സമരത്തെത്തുടര്ന്ന് മറ്റൊരു സ്ഥാപനത്തിനു കൂടി പൂട്ടു വീഴുന്നത്. കഴിഞ്ഞ മാസം 23നാണ് ഈ സ്ഥാപനം പ്രവര്ത്തനം ആരംഭിച്ചത്. പിന്നാലെ തൊഴില് നിഷേധം ആരോപിച്ച് കടക്ക് മുന്നില് സി.ഐ.ടിയു സമരം തുടങ്ങി.
യൂണിയന് അംഗങ്ങളായ തൊഴിലാളികളെ കയറ്റിറക്കിന് നിയോഗിക്കണമെന്ന് ആവശ്യപ്പെട്ടായിരുന്നു സി.ഐ.ടിയു സമരം. എന്നാല് ഈ ആവശ്യം അംഗീകരിക്കാന് കടയുടമ തയാറായില്ല. ഇതോടെ കടയിലേക്കുള്ള കയറ്റിറക്ക് സി.ഐ.ടിയു പ്രവര്ത്തകര് തടഞ്ഞു. പോലീസിന്റെ മധ്യസ്ഥതയില് രണ്ട് വട്ടം ചര്ച്ച നടന്നെങ്കിലും ഫലം കണ്ടില്ല. ഇതോടെയാണ് കട അടച്ചു പൂട്ടാന് ഉടമകള് തീരുമാനിച്ചത്

