ആലപ്പുഴ: ജില്ലയിലെ ഒരു ഡസനോളം സഹകരണ ബാങ്കുകളിൽ ക്രമക്കേട് കണ്ടെത്തിയതിനെ തുടർന്ന് സഹകരണ നിക്ഷേപകർ ആശങ്കയിലായി. പല ബാങ്കുകൾക്കുമെതിരെ പണം തിരികെ ലഭിക്കാതെ നിക്ഷേപകർ സമരത്തിലുമാണ്. സിപിഐ എമ്മും കോൺഗ്രസ്സും ഭരിക്കുന്ന ബാങ്കുകളാണിവ. മാവേലിക്കര താലൂക്ക് സഹകരണ ബാങ്കിൽ നടന്ന കോടികളുടെ അഴിമതിയെ തുടർന്ന് ബാങ്ക് വൻ പ്രതിസന്ധിയിലായി. നിരവധി നിക്ഷേപകർക്കാണ് പണം നഷ്ടമായത്. പണം നഷ്ടമായ നിക്ഷേപകർ കഴിഞ്ഞ ഒരു മാസമായി ബാങ്ക് ഹെഡ് ഓഫീസിനു മുന്നിൽ സമരത്തിലാണ്. കോൺഗ്രസിന്റെ നേതൃത്വത്തിലുള്ള ഭരണ സമിതിയാണ് ബാങ്ക് ഭരണം കൈയ്യാളുന്നത്. സിപിഐഎം, കോൺഗ്രസ് ഭരണസമിതികൾ ഭരിക്കുന്ന പട്ടണക്കാട്, കൈനകരി, ചേർത്തല, രാമങ്കരി തുടങ്ങിയ സഹകരണ ബാങ്കുകളിലും വൻ ക്രമക്കേടുകൾ പുറത്തുവന്നിട്ടുണ്ട്. ആയിരക്കണക്കിന് നിക്ഷേപകരാണ് പണം ജീവിതത്തിൽ പല നിർണ്ണായക ആവശ്യങ്ങൾക്കുമായി ചേർത്തുവച്ച പണം നഷ്ടമായതറിഞ്ഞ് ആശങ്കയിലായത്.
സഹകരണ മേഖലയിലെ ഇത്തരം പ്രതിസന്ധികൾക്കെതിരെ സഹകരണ വകുപ്പ് രൂപീകരിച്ച് ശക്തമായ നിയമനിർമ്മാണത്തിനൊരുങ്ങുകയാണ് കേന്ദ്രസർക്കാർ. കേന്ദ്ര സർക്കാരിന്റെ ഈ നീക്കത്തിനെതിരെ എൽ ഡി എഫും യു ഡി എഫും ജന വിരുദ്ധ സംയുക്ത സമരം നടത്തുകയാണ്. നിയമ നിർമ്മാണത്തിനെതിരെ വ്യാജ പ്രചാരണങ്ങളും തുടരുന്നു.
