വലിയകോയിക്കല്: മകരവിളക്കിനു ശബരിമല ശ്രീ ധർമ്മശാസ്താവിന്റെ തിരുവിഗ്രഹത്തിൽ ചാർത്താനുള്ള തിരുവാഭരണവുമായി പോകുന്ന ഘോഷയാത്രാ സംഘത്തിനു രോഗ പ്രതിരോധശക്തിയുണ്ടാകാനുള്ള ആയുർവേദ മരുന്ന് നല്കി കോയമ്പത്തൂർ ആര്യവൈദ്യ ഫാർമസി. ആര്യവൈദ്യ ഫാർമസി ഡെപ്യൂട്ടി ചീഫ് മെഡിക്കൽ ഓഫീസർ ഡോ. പത്മജനാണ് ഗുരുസ്വാമി കുളത്തിനാൽ ഗംഗാധരൻ പിള്ളയ്ക്കു മരുന്നുകൾ കൈമാറിയത്. വലിയകോയിക്കൽ ശ്രീധർമ്മശാസ്താ ക്ഷേത്രത്തിൽ പന്തളം കൊട്ടാരം നിർവ്വാഹക സംഘം പ്രസിഡൻ്റ് പി.ജി. ശശികുമാർ വർമ്മയുടെ അദ്ധ്യക്ഷതയിൽ നടന്ന ചടങ്ങിന്റെ ഉദ്ഘാടനം പന്തളം നഗരസഭാദ്ധ്യക്ഷ സുശീല സന്തോഷ് നിര്വ്വഹിച്ചു.
കൊട്ടാരം നിർവ്വാഹക സംഘം സെക്രട്ടറി പി.എൻ. നാരായണ വർമ്മ, നഗരസഭാ കൗൺസിലർ പുഷ്പലത, ക്ഷേത്രോപദേശക സമിതി പ്രസിഡൻ്റ് ജി. പൃഥ്വിപാൽ, സെക്രട്ടറി ശരത്, ആയുർവ്വേദ ഫാർമസി മാനേജർ ഉണ്ണിക്കൃഷ്ണൻ, ക്ഷേത്രം അഡ്മിനിസ്ട്രേറ്റീവ് ഓഫീസർ എൻ. രാജീവ് കുമാർ എന്നിവർ ചടങ്ങില് പങ്കെടുത്തു. ചടങ്ങില് ഡോ. പത്മജനെയും, ഉണ്ണിക്കൃഷ്ണനെയും പന്തളം കൊട്ടാരം പൊന്നാടയണിയിച്ച് ആദരിച്ചു.