ബെംഗളുരു: ജമ്മു കശ്മീരിന് പ്രത്യേക പദവി നൽകിയിരുന്ന ഭരണഘടനയുടെ 370-ാം അനുച്ഛേദം എടുത്തുകളയുവാനുള്ള മോദി സർക്കാരിന്റെ തീരുമാനത്തെ പിന്തുണച്ച് കോണ്ഗ്രസ് നേതാവ് ജനാർദനൻ ദ്വിവേദി. ചരിത്രത്തിലെ ഒരു മണ്ടത്തരം തിരുത്തപ്പെട്ടെന്നായിരുന്നു അദ്ദേഹത്തിന്റെ പരാമർശം.
എന്റെ ഗുരുവായ രാം മനോഹർ ലോഹ്യ കശ്മീരിന് പ്രത്യേക പദവി നൽകുന്ന ആർട്ടിക്കിൾ 370-ന് എതിരായിരുന്നു. ഞങ്ങളോട് അദ്ദേഹം ഇതിനെകുറിച്ച് സംസാരിച്ചു. എന്റെ വ്യക്തിപരമായ കാഴ്ചപ്പാടിൽ ഇത് ദേശീയ താത്പര്യത്തിന് അനുകൂലമാണ്. വളരെ വൈകിയെങ്കിലും സ്വാതന്ത്ര്യത്തിനുശേഷം സംഭവിച്ച ഒരു മണ്ടത്തരം തിരുത്തപ്പെട്ടിരിക്കുന്നു, പാർട്ടിയുടെ പേരിലല്ല താൻ സംസാരിക്കുന്നതെന്നും ജനാര്ദനന് ദ്വിവേദി വ്യക്തമാക്കി.
അതേസമയം ആർട്ടിക്കിൾ 370 റദ്ദാക്കിക്കൊണ്ടുള്ള കേന്ദ്രതീരുമാനത്തെ ചൊല്ലി കോണ്ഗ്രസിൽ ഭിന്നത തുടരുകയാണ്. കോണ്ഗ്രസ് നിലപാട് ആത്മഹത്യാപരമാണെന്ന് അഭിപ്രായപ്പെട്ട് മുതിർന്ന നേതാവും രാജ്യസഭാ വിപ്പുമായ ഭുവനേശ്വർ കാലിത രാജിവച്ചിരുന്നു. വിഷയത്തിൽ രാഹുൽ ഗാന്ധിയും പ്രിയങ്ക ഗാന്ധിയും ഇതേവരെ നിലപാട് വ്യക്തമാക്കിയിട്ടില്ല.
