എഫ്ബി കമന്റിനെ ചൊല്ലി തർക്കം ! വാണിയംകുളത്ത് ക്രൂരമര്‍ദനമേറ്റ മുൻ ഡിവൈഎഫ്ഐ നേതാവ് വെന്റിലേറ്ററിൽ!! ആക്രമിച്ചത് ബ്ലോക്ക് ഭാരവാഹികള്‍

വാണിയംകുളം : എഫ്ബി കമന്റിനെ ചൊല്ലിയുള്ള തർക്കത്തെ തുടർന്ന് മർദ്ദനമേറ്റ ഡിവൈഎഫ്‌ഐ മേഖല മുന്‍ ജോയിന്റ് സെക്രട്ടറി വെന്റിലേറ്ററിൽ. വാണിയംകുളം പനയൂര്‍ തോട്ടപ്പളളിയാലില്‍ വിനേഷി(38)നാണ് മര്‍ദനമേറ്റത്. ഡിവൈഎഫ്‌ഐ ഷൊര്‍ണൂര്‍ ബ്ലോക്ക് ഭാരവാഹികളുടെ നേതൃത്വത്തിലാണ് ക്രൂരമര്‍ദനമെന്നാണ് പോലീസ് പറയുന്നത്. സംഭവുമായി ബന്ധപ്പെട്ട് രണ്ട് പേരെ പോലീസ് കസ്റ്റഡിയിലെടുത്തതായാണ് വിവരം. ഇന്നലെ രാത്രി പത്തരയോടെയാണ് സംഭവം.

വാണിയംകുളത്തും പിന്നീട് പനയൂരില്‍വെച്ചുമാണ് വിനേഷിന് ക്രൂരമര്‍ദനമേറ്റത്.മർദിച്ച ശേഷം വിനേഷിനെ പനയൂരിലെ വീട്ടില്‍ കൊണ്ടുവന്ന് വിടുകയായിരുന്നു. രക്തത്തിൽ കുളിച്ചു കിടന്ന വിനേഷിനെ അച്ഛന്‍ കൊച്ചൂട്ടനാണ് ആംബുലന്‍സില്‍ വാണിയംകുളത്തെ സ്വകാര്യ ആശുപത്രിയില്‍ എത്തിക്കുന്നത്.

വിനേഷിനെ സംഘടനാ നടപടികളുടെ ഭാഗമായി നാലുവര്‍ഷം മുമ്പ് പാര്‍ട്ടിയില്‍നിന്ന് ഒഴിവാക്കിയിരുന്നു. വാണിയംകുളം കുനത്തറ ഡിവൈഎഫ്‌ഐ മേഖല കമ്മിറ്റിയുടെ മുന്‍ ജോയിന്റ് സെക്രട്ടറിയായിരുന്നു. ഡിവൈഎഫ്‌ഐയിലെ ചുമതലകളിലും നിലവില്‍ വിനേഷില്ല. സംഭവത്തില്‍ ഷൊര്‍ണൂര്‍ പോലീസിന്റെ നേതൃത്വത്തില്‍ അന്വേഷണം തുടങ്ങി.