കോവിഡ്: ആശ്വാസത്തോടെ രാജ്യം; രോഗമുക്തി നിരക്ക് കുതിക്കുന്നു; 24 മണിക്കൂറിനിടെ 6,984 പേർക്ക് മാത്രം രോഗം

ദില്ലി: രാജ്യത്ത് കോവിഡ് വ്യാപനം (Covid Spread) കുറയുന്നു. കഴിഞ്ഞ 24 മണിക്കൂറിനിടെ 6,984 പേർക്ക് മാത്രമാണ് കോവിഡ് സ്ഥിരീകരിച്ചത്. എന്നാൽ രോഗം ബാധിക്കുന്നവരേക്കാൾ മുക്തി നേടുന്നവരുടെ നിരക്കാണ് കൂടുതൽ. ഇന്നലെ മാത്രം 8,168 പേരാണ് കോവിഡിൽ നിന്നും മുക്തി നേടിയത്. ഇന്നലെ റിപ്പോർട്ട് ചെയ്ത രോഗികളെക്കാൾ 20.7 ശതമാനം വർദ്ധനവ് രോഗബാധിതരുടെ നിരക്കിൽ ഇന്ന് രേഖപ്പെടുത്തിയിട്ടുണ്ട്.

കഴിഞ്ഞ ദിവസങ്ങളിലുണ്ടായ 247 മരണങ്ങൾ കോവിഡ് മൂലമാണെന്ന് സ്ഥിരീകരിച്ചിട്ടുണ്ട്. ഇതോടെ രാജ്യത്ത് വൈറസ് ബാധിച്ച് മരിച്ചവരുടെ എണ്ണം 4,76,135 ആയി. ആകെ, 3.47 കോടിയിലധികം പേർക്കാണ് ഇതുവരെ രാജ്യത്ത് രോഗം ബാധിച്ചിട്ടുള്ളത്. ഇതിൽ 3.4 കോടിയിലധികം പേർക്കും രോഗം ഭേദമായി.
ആകെ 87,562 പേരാണ് നിലവിൽ കോവിഡ് ബാധിച്ച് ചികിത്സയിലുള്ളത്. 98.38 ശതമാനമാണ് രോഗമുക്തി നിരക്ക്. പ്രതിദിന പോസിറ്റിവിറ്റി നിരക്ക് 0.58 ശതമാനമാണ്. ഇതുവരെ 134.61 കോടി വാക്‌സിൻ ഡോസുകൾ ഇന്ത്യയിൽ വിതരണം ചെയ്തു കഴിഞ്ഞു.

അതേസമയം കേരളത്തിൽ കഴിഞ്ഞ ദിവസം 3,377 പേര്‍ക്ക് മാത്രമാണ് കോവിഡ് സ്ഥിരീകരിച്ചത്. എറണാകുളം 580, തിരുവനന്തപുരം 566, കോട്ടയം 323, കോഴിക്കോട് 319, തൃശൂര്‍ 306, കണ്ണൂര്‍ 248, കൊല്ലം 233, പത്തനംതിട്ട 176, മലപ്പുറം 142, ആലപ്പുഴ 129, പാലക്കാട് 105, വയനാട് 102, ഇടുക്കി 90, കാസര്‍ഗോഡ് 58 എന്നിങ്ങനെയാണ് ജില്ലകളിലെ ഇന്ന് രോഗബാധാ നിരക്ക്. സംസ്ഥാനത്തെ വിവിധ ജില്ലകളിലായി 1,53,474 പേരാണ് ഇപ്പോള്‍ നിരീക്ഷണത്തിലുള്ളത്. ഇവരില്‍ 1,49,245 പേര്‍ വീട്/ഇന്‍സ്റ്റിറ്റിയൂഷണല്‍ ക്വാറന്റൈനിലും 4229 പേര്‍ ആശുപത്രികളിലും നിരീക്ഷണത്തിലാണ്. 213 പേരെയാണ് പുതുതായി ആശുപത്രിയില്‍ പ്രവേശിപ്പിച്ചത്. നിലവില്‍ 35,410 കോവിഡ് കേസുകളില്‍, 8 ശതമാനം വ്യക്തികള്‍ മാത്രമാണ് ആശുപത്രി/ഫീല്‍ഡ് ആശുപത്രികളില്‍ പ്രവേശിപ്പിക്കപ്പെട്ടിട്ടുള്ളത്.