കുതിരാൻ തുരങ്കത്തിനുള്ളിൽ വിള്ളലും കുഴിയും;കേടുപാടുണ്ടായത് 10 വർഷത്തെ ഗാരന്റിയിൽ കോൺക്രീറ്റ് ചെയ്‌ത റോഡിൽ

തൃശൂർ : കുതിരാൻ തുരങ്കത്തിനുള്ളിൽ പാലക്കാട് ഭാഗത്തേക്കുള്ള റോഡിൽ വിള്ളൽ പ്രത്യക്ഷപ്പെട്ടു. റോഡിനു നടുവിൽ ചെറിയ കുഴിയും രൂപപ്പെട്ടിട്ടുണ്ട്. ആകെയുള്ള 3 ട്രാക്കുകളുടെ മധ്യത്തിലാണു 10 മീറ്റർ നീളത്തിൽ റോഡ് പിളർന്നിരിക്കുന്നത്. ഇതിനു തൊട്ടടുത്താണു കുഴി രൂപപ്പെട്ടത്. തുരങ്കത്തിലേക്കു പ്രവേശിക്കുന്നതിന് 100 മീറ്റർ ഉള്ളിലായിട്ടാണു കോൺക്രീറ്റ് റോഡ് തകർന്നിരിക്കുന്നത്.10 വർഷത്തെ ഗാരന്റിയിലാണു റോഡ് കോൺക്രീറ്റ് ചെയ്തത്. കുതിരാൻ തുരങ്കത്തിലേക്കു പ്രവേശിക്കുന്നതിനു തൊട്ടുമുൻപുള്ള വഴുക്കുംപാറ മേൽപാതയിൽ കഴിഞ്ഞാഴ്ച വിള്ളൽ കണ്ടിരുന്നത് വിവാദമായിരുന്നു.