ദുബായ്: ഐപിഎല്ലിന്റെ ഈ സീസണിനു ശേഷം വിരമിക്കാന് ഉദ്ദേശിക്കുന്നില്ലെന്ന സൂചന നല്കി ഇതിഹാസ നായകന് എം എസ് ധോണി. ധോണി (Dhoni) ഈ സീസണിനു ശേഷം കളി മതിയാക്കിയേക്കുമെന്ന അഭ്യൂഹങ്ങള് ശക്തമാണ്. പക്ഷെ അടുത്ത സീസണിലും തന്നെ പ്രതീക്ഷിക്കാമെന്ന സൂചനയാണ് അദ്ദഹം ഇപ്പോള് നല്കിയിരിക്കുന്നത്.
ചെന്നൈ സൂപ്പര് കിങ്സിന്റെ ഹോംഗ്രൗണ്ടായ ചെന്നൈയിലെ ചെപ്പോക്ക് സ്റ്റേഡിയത്തില് വിടവാങ്ങല് മല്സരം കളിക്കാനാണ് ആഗ്രഹിക്കുന്നതെന്നാണ് ധോണി വെളിപ്പെടുത്തിയിരിക്കുന്നത്. ‘ഇന്ത്യ സിമന്റ്സി’ന്റെ 75ാം വാർഷിക ആഘോഷവേളയിൽ വെർച്വലായി പങ്കെടുക്കവേയാണ് താരത്തിന്റെ പ്രസ്താവന. എനിക്കു യാത്രയയപ്പ് നല്കാന് നിങ്ങള്ക്കു ഇനിയും അവസരം ലഭിക്കും. ഞാന് അവസാനത്തെ മല്സരം കളിക്കുന്ന ചെന്നൈയില് നിങ്ങള്ക്കും എത്താന് കഴിയുമെന്നു പ്രതീക്ഷിക്കുന്നു. എല്ലാ ആരാധകരെയും എനിക്കു ഇവിടെ വച്ച് കാണാന് കഴിയുമെന്നും ധോണി കൂട്ടിച്ചേർത്തു.
അതേസമയം ധോണി ബാറ്റിങില് മോശം ഫോം തുടരുകയാണെങ്കിലും ചെന്നൈ സൂപ്പര് കിങ്സ് ഈ സീസണില് ഉജ്ജ്വല ഫോമിലാണ്. രാജ്യാന്തര മത്സരങ്ങളിൽനിന്ന് 2020 ഓഗസ്റ്റിൽ വിരമിച്ച ധോണി നിലവിൽ ഐപിഎലിൽ മാത്രമാണ് കളിക്കുന്നത്.