തൃശൂർ: ഗുരുവായൂർ കിഴക്കെ നടയിലെ ഇന്ത്യൻ കോഫി ഹൗസിൽ നിന്ന് വാങ്ങിയ മസാല ദോശയിൽ ചത്ത പഴുതാര കണ്ടെത്തിയതായി പരാതി. പാവറട്ടി സ്വദേശികളായ ഒരു കുടുംബമാണ് മസാല ദോശയിൽ പഴുതാരയെ ലഭിച്ചതായി അറിയിച്ചത്.
തുടർന്ന്, അവർ ഈ വിഷയത്തിൽ ഹോട്ടൽ അധികൃതരെ വിവരമറിയിച്ചെങ്കിലും നടപടിയൊന്നും സ്വീകരിച്ചില്ലെന്ന് പരാതിക്കാർ പറയുന്നു. ഇതേ തുടർന്ന്, പരാതിക്കാർ ഈ സംഭവത്തിന്റെ വീഡിയൊ സമൂഹമാധ്യമങ്ങളിൽ പ്രചരിപ്പിച്ചു.
വീഡിയോ സമൂഹമാധ്യമങ്ങളിൽ പ്രചരിച്ച സാഹചര്യത്തിൽ, ആരോഗ്യ വിഭാഗം ഇടപെട്ട് ഹോട്ടൽ താത്കാലികമായി അടപ്പിക്കുകയും ശുചീകരണ പ്രവർത്തനങ്ങൾ ആരംഭിക്കാനായി നിർദ്ദേശിക്കുകയും ചെയ്തു. ഹോട്ടലിൽ നിന്നും പിഴ ഈടാക്കുന്നത് ഉൾപ്പെടെയുള്ള നടപടികൾ സ്വീകരിക്കുമെന്നും ആരോഗ്യവകുപ്പ് അറിയിച്ചു.
