ശ്രീനഗർ: കഴിഞ്ഞ നവംബറിൽ ദില്ലി ചെങ്കോട്ടയ്ക്ക് സമീപം നടന്ന ഭീകരാക്രമണത്തിന്റെ അന്വേഷണത്തിന്റെ ഭാഗമായി ഷോപ്പിയാനിലെ പദ്പവൻ വനമേഖലയിൽ ദേശീയ അന്വേഷണ ഏജൻസി തെരച്ചിൽ നടത്തി. കേസിലെ ഒൻപതാം പ്രതിയായ ഷോപ്പിയാൻ സ്വദേശി യാസിർ അഹമ്മദ് ദാറിനെ സംഭവസ്ഥലത്ത് നേരിട്ടെത്തിച്ചാണ് തെളിവെടുപ്പ് നടത്തിയത്. ഡിസംബർ 18-ന് ദില്ലിയിൽ നിന്നാണ് യാസിർ ദാറിനെ പിടികൂടിയത്. സ്ഫോടനത്തിന്റെ ആസൂത്രണത്തിലും ഗൂഢാലോചനയിലും ഇയാൾക്ക് നേരിട്ട് പങ്കുണ്ടെന്ന് എൻഐഎ വ്യക്തമാക്കുന്നു. യുഎപിഎ (UAPA), ഭാരതീയ ന്യായ സംഹിത (BNS) എന്നിവയിലെ കർശന വകുപ്പുകൾ പ്രകാരമാണ് ഇയാൾക്കെതിരെ കേസെടുത്തിരിക്കുന്നത്.
നവംബർ 10-ന് വൈകുന്നേരം ചെങ്കോട്ടയ്ക്ക് മൂന്നാം കവാടത്തിന് സമീപം നിർത്തിയിട്ടിരുന്ന കാറിൽ വെച്ച ഐഇഡി പൊട്ടിത്തെറിച്ച് 15 പേർ കൊല്ലപ്പെടുകയും നിരവധി പേർക്ക് പരിക്കേൽക്കുകയും ചെയ്തിരുന്നു. ഈ ആക്രമണം നടത്തിയത് പുൽവാമ സ്വദേശിയായ ഡോക്ടർ ഉമർ ഉൻ നബിയാണെന്ന് ഫോറൻസിക് പരിശോധനയിൽ തെളിഞ്ഞിരുന്നു. ഈ ചാവേറുമായി യാസിർ ദാറിന് അടുത്ത ബന്ധമുണ്ടായിരുന്നുവെന്നും ഏത് തരത്തിലുള്ള ചാവേർ ആക്രമണത്തിനും താൻ സജ്ജനാണെന്ന് ഇയാൾ ഗൂഢാലോചനക്കാർക്ക് ഉറപ്പുനൽകിയിരുന്നുവെന്നും എൻഐഎ കണ്ടെത്തിയിട്ടുണ്ട്. ഭീകരവാദികളെ റിക്രൂട്ട് ചെയ്യുന്നതിലും അവർക്ക് വേണ്ട പ്രത്യയശാസ്ത്രപരമായ ക്ലാസുകൾ നൽകുന്നതിലും യാസിറിന് വലിയ പങ്കുണ്ടായിരുന്നു.
വിദ്യാസമ്പന്നരായ ഉദ്യോഗസ്ഥരും ഡോക്ടർമാരും ഉൾപ്പെട്ട ‘വൈറ്റ് കോളർ ഭീകര ശൃംഖല’യാണ് ഈ ആക്രമണത്തിന് പിന്നിലെന്ന് അന്വേഷണത്തിൽ വ്യക്തമായിട്ടുണ്ട്. ഡോക്ടർമാർ, ഫാർമക്കോളജിസ്റ്റ് തുടങ്ങിയവർ തങ്ങളുടെ പദവികൾ മറയാക്കി ഭീകരപ്രവർത്തനങ്ങൾക്ക് സഹായം നൽകുകയായിരുന്നു. പാകിസ്ഥാൻ കേന്ദ്രമായി പ്രവർത്തിക്കുന്ന ജെയ്ഷെ മുഹമ്മദ് പോലുള്ള സംഘടനകളുമായി ഈ ശൃംഖലയ്ക്ക് ബന്ധമുണ്ടെന്ന് എൻഐഎ സംശയിക്കുന്നു.
ഹരിയാനയിലെ അൽ-ഫലാഹ് യൂണിവേഴ്സിറ്റിയിലെ ഡോക്ടർ മുസാമിൽ ഷക്കീൽ ഗനായ്, ലഖ്നൗവിലെ ഫാർമക്കോളജിസ്റ്റ് ഡോക്ടർ ഷഹീൻ സയീദ്, ഉത്തരാഖണ്ഡിലെ ഹൽദ്വാനിയിലുള്ള ബിമാലി പള്ളിയിലെ ഇമാം മുഹമ്മദ് ആസിഫ് തുടങ്ങിയ പ്രമുഖരെ ഇതിനോടകം എൻഐഎ അറസ്റ്റ് ചെയ്തിട്ടുണ്ട്.
ജമ്മു കശ്മീർ, ഹരിയാന, ഉത്തർപ്രദേശ് തുടങ്ങി വിവിധ സംസ്ഥാനങ്ങളിലായി വ്യാപിച്ചുകിടക്കുന്ന ഈ ഗൂഢാലോചനയുടെ സാമ്പത്തിക സ്രോതസ്സുകൾ കണ്ടെത്താനാണ് ഇപ്പോൾ എൻഐഎ ശ്രമിക്കുന്നത്. അറസ്റ്റിലായവരിൽ നിന്ന് ഡിജിറ്റൽ ഉപകരണങ്ങളും നിർണ്ണായക രേഖകളും പിടിച്ചെടുത്തിട്ടുണ്ട്. വരും ദിവസങ്ങളിൽ ഈ കേസിൽ കൂടുതൽ അറസ്റ്റുകൾ ഉണ്ടാകാൻ സാധ്യതയുണ്ടെന്ന് എൻഐഎ വൃത്തങ്ങൾ സൂചിപ്പിച്ചു. രാജ്യത്തെ പ്രമുഖ സ്ഥാപനങ്ങളിൽ ജോലി ചെയ്യുന്നവർ തന്നെ ഇത്തരം ആക്രമണങ്ങളിൽ പങ്കാളികളാകുന്നത് സുരക്ഷാ ഏജൻസികളെ വലിയ ആശങ്കയിലാക്കുന്നുണ്ട്.
