വത്തിക്കാന് : ഇന്ത്യയില്നിന്ന് വിശുദ്ധപദവിയിലേക്ക് ഉയര്ത്തപ്പെടുന്ന പ്രഥമ അല്മായ രക്തസാക്ഷിയായി ദേവസഹായം പിള്ള. ദേവസഹായം പിള്ളയെ വിശുദ്ധനായി വത്തിക്കാനിൽ നടന്ന ചടങ്ങിൽ പ്രഖ്യാപിച്ചു. വത്തിക്കാനിലെ സെന്റ് പീറ്റേഴ്സ് ചത്വരത്തില് നടന്ന ചടങ്ങില് ഫ്രാന്സിസ് മാര്പ്പാപ്പയാണ് അദ്ദേഹത്തെ വിശുദ്ധനായി പ്രഖ്യാപിച്ചത്.
ചടങ്ങുമായി ബന്ധപ്പെട്ട് ഇന്ത്യയിലെ ദേവാലയങ്ങളില് ഉച്ചകഴിഞ്ഞ് 2.30ന് മണികള് മുഴക്കി. വിശുദ്ധപദവിയിലേക്ക് ഉയര്ത്തിയതിന്റെ ദേശീയതല ആഘോഷം ജൂണ് അഞ്ചിന് വിശുദ്ധ ദേവസഹായത്തിന്റെ ഭൗതികശരീരം അടക്കം ചെയ്തിരിക്കുന്ന കോട്ടാര് സെന്റ് ഫ്രാന്സിസ് സേവ്യര് ദേവാലയത്തില് നടക്കും. ദേവസഹായം പിള്ളയുമായി ബന്ധപ്പെട്ട കേരളത്തിലെ പള്ളികളിൽ പ്രത്യേക പ്രാർത്ഥനയും ചടങ്ങുകളും നടന്നു.