അമ്പലപ്പുഴ: അമ്പലപ്പുഴ പാല്പ്പായസം, കൊട്ടാരക്കര ഗണപതി ക്ഷേത്ര ഉണ്ണിയപ്പം, ശബരിമല അരവണ, ഉണ്ണിയപ്പം തുടങ്ങിയ ദേവസ്വം ബോര്ഡിന്റെ ക്ഷേത്രങ്ങളിലെ വഴിപാട് പ്രസാദ ഇനങ്ങള്ക്ക് പേറ്റന്റ് നേടിയെടുക്കാന് തിരുവിതാംകൂര് ദേവസ്വം ബോര്ഡ് നടപടി ആരംഭിച്ചു. അമ്പലപ്പുഴ ശ്രീകൃഷ്ണസ്വാമിക്ഷേത്രത്തിലെ നിത്യനിവേദ്യമായ പാല്പ്പായസം ഭക്തരെ തെറ്റിദ്ധരിപ്പിച്ച് ,വ്യാജമായി നിര്മ്മിച്ച് ചില ബേക്കറികളില് വില്ക്കുന്നത് ശ്രദ്ധയില്പ്പെട്ടതിനെ തുടര്ന്ന് തിരുവിതാംകൂര് ദേവസ്വം ബോര്ഡ് അത്തരം സ്ഥാപനങ്ങള്ക്കെതിരെ നിയമ നടപടി സ്വീകരിച്ചു വരികയാണ്. ഈ പശ്ചാത്തലത്തിലാണ് പേറ്റന്റ് നേടിയെടുക്കാന് ശ്രമിക്കുന്നതെന്ന് തിരുവിതാംകൂര് ദേവസ്വം ബോര്ഡ് പ്രസിഡന്റ് എ.പത്മകുമാര് അറിയിച്ചു.
ചില ബേക്കറികള്ക്ക് പുറമെ കേറ്ററിംഗ് സ്ഥാപനങ്ങളും കല്യാണങ്ങള്ക്ക് പാചകക്കാരും ഉള്പ്പെടെ അമ്പലപ്പുഴ പാല്പ്പായസം എന്ന രീതിയില് ആളുകളെ തെറ്റിദ്ധരിപ്പിച്ച് പായസം ഉണ്ടാക്കി പണം ഈടാക്കി നല്കുന്നുണ്ട്. ഇക്കാര്യത്തിലും നിയമനടപടി സ്വീകരിക്കും. ഈ വിഷയത്തില് വിശദമായ അന്വേഷണം നടത്തി റിപ്പോര്ട്ട് സമര്പ്പിക്കാന് ദേവസ്വം ഉന്നത ഉദ്യോഗസ്ഥരെ നിയമിച്ചതായും പ്രസിഡന്റ് അറിയിച്ചു.
ഇതിനു പുറമെ വിഷയത്തില് നിയമവകുപ്പിന്റെ സഹായത്തോടെ തുടര്നടപടികള് സ്വീകരിക്കാന് ദേവസ്വം കമ്മിഷണര് എം.ഹര്ഷനെ ബോര്ഡ് ചുമതലപ്പെടുത്തി. ദേവസ്വം ബോര്ഡിന്റെ ചരിത്രത്തിലാദ്യമായാണ് വഴിപാട് സാധനത്തിന് ഇത്തരത്തില് പേറ്റന്റ് നേടാന് നടപടി സ്വീകരിക്കുന്നതെന്നും എ.പത്മകുമാര് വ്യക്തമാക്കി.
പ്രസിദ്ധമായ അമ്പലപ്പുഴ പാല്പ്പായസത്തിന്റെ പേര് കച്ചവട ആവശ്യത്തിനായി ദുരുപയോഗം ചെയ്യുന്നത് ബോര്ഡിന്റെ ശ്രദ്ധയില്പ്പെട്ട സമയത്ത് തന്നെ ബോര്ഡ് നിയമനടപടി സ്വീകരിച്ച് തുടങ്ങി. കഴിഞ്ഞദിവസം ചേര്ന്ന ദേവസ്വം ബോര്ഡിന്റെ സമ്പൂര്ണയോഗം വിഷയം ചര്ച്ചചെയ്ത് ആണ് വഴിപാട് ഇനങ്ങള്ക്ക് പേറ്റന്റ് നേടിയെടുക്കുന്നതിനായി തീരുമാനിച്ചത്. ഇക്കാര്യം വീണ്ടും ബോര്ഡ് ചര്ച്ച ചെയ്ത് തുടര് നടപടികള് സ്വീകരിക്കുമെന്നും ദേവസ്വം ബോര്ഡ് പ്രസിഡന്റ് പറഞ്ഞു.
