മേടവിഷു പൊൻപുലരിയിൽ അയ്യനെ വണങ്ങാൻ തയ്യാറെടുത്ത് ഭക്തർ !ഞായറാഴ്ച പുലർച്ചെ 4 മണിക്ക് ശബരിമല നട തുറക്കും.

വിഷുക്കണി ദർശനത്തിനൊരുങ്ങി സന്നിധാനം. ശനിയാഴ്ച രാത്രി 9.30 ന് അത്താഴ പൂജയ്ക്ക് ശേഷം ശ്രീകോവിലിൽ ഓട്ടുരുളിയിൽ  ശബരിമല ശ്രീ ധർമ്മ ശാസ്താവിന്റെ മുന്നിൽ വിഷുക്കണി ഒരുക്കും. ശേഷം ഹരിവരാസനം പാടി തിരുനട അടയ്ക്കും.

വിഷുവായ മേടം ഒന്നിന് (ഏപ്രിൽ 14 ന്) പുലർച്ചെ 4 മണിക്ക് തിരുനട തുറക്കും. നട തുറന്ന് ശ്രീകോവിലിൽ വിളക്കുകൾ തെളിച്ച് ആദ്യം അയ്യപ്പ സ്വാമിയെ വിഷുക്കണി കാണിയ്ക്കും. ശേഷം ഭക്തർക്ക് വിഷുകണി ദർശനത്തിനായി നടതുറന്നു കൊടുക്കും. ഭക്തർക്ക് തന്ത്രിയും മേൽശാന്തിയും കൈനീട്ടവും നൽകും.4 മണി മുതൽ 7 മണിവരെ വിഷുക്കണി ദർശനം ഉണ്ടാകും. ശേഷം പതിവ് അഭിഷേകവും ഉഷപൂജയും നെയ്യഭിഷേകവും നടക്കും. ഉച്ചക്ക് 1 മണിക്ക് തിരുനട അടയ്ക്കും . വൈകുന്നേരം 5 മണിക്ക് വീണ്ടും തുറക്കുന്ന തിരുനട രാത്രി 10 ന് ഹരിവരാസനം പാടി അടയ്ക്കും.

ശബരിമലയിലെ വിഷു ദിനചടങ്ങുകൾ (14.04.2024 ഞായറാഴ്ച )

പുലർച്ചെ 4 മണിക്ക് നട തുറക്കൽ
4 മണി മുതൽ 7 മണി വരെ വിഷുക്കണി ദർശനം
7.30 ന് ഉഷപൂജ
8 മണി മുതൽ 11 മണി വരെ നെയ്യഭിഷേകം
11.40 ന് 25 കലശാഭിഷേകം
തുടർന്ന് കളഭാഭിഷേകം
12.30 ന് ഉച്ചപൂജ
1 മണിക്ക് നട അടയ്ക്കൽ
വൈകുന്നേരം 5 മണിക്ക് തിരുനട തുറക്കും
6.30 ന് ദീപാരാധന
6.45 ന് പടിപൂജ
8 മണിക്ക് പുഷ്പാഭിഷേകം
9 മണിക്ക് അത്താഴ പൂജ
10 മണിക്ക് ഹരിവരാസനം പാടി നട അടയ്ക്കും