തിരുവനന്തപുരം: വിഴിഞ്ഞം പൊഴിക്കരയില്‍ കോവിഡ് മാനദണ്ഡം ലംഘിച്ച്‌ ഡി.ജെ പാര്‍ട്ടി നടത്തി. ക്രിസ്മസ് ആഘോഷമെന്ന നിലയിലാണ് ഡിജെ സംഘടിപ്പിച്ചത്. ജില്ലയുടെ വിവിധ ഭാഗങ്ങളില്‍ നിന്നായി ആയിരത്തോളം പേരാണ് പരിപാടിയില്‍ പങ്കെടുത്തത്. പത്ത് സംഘങ്ങളായി പലസമയങ്ങളിലായി എത്തിയാണ് പാര്‍ട്ടിയില്‍ പങ്കെടുത്തത്. സംഭവത്തില്‍ പൊഴിയൂര്‍ പൊലീസ് കേസെടുത്തിട്ടുണ്ട്. പാര്‍ട്ടിക്ക് അനുമതിയുണ്ടായിരുന്നില്ലെന്നാണ് പൊലീസ് വ്യക്തമാക്കുന്നത്.
പരിപാടി നടത്തരുതെന്ന് കാണിച്ച്‌ പൊലീസ് നോട്ടീസ് നല്‍കിയിരുന്നെങ്കിലും ഇത് അവഗണിച്ച്‌ പരിപാടിയുമായി സംഘാടകര്‍ മുന്നോട്ടു പോവുകയായിരുന്നു. ‘ഫ്രീക്ക്സ്’ എന്ന പേരിലുള്ള യുവജന കൂട്ടായ്മയാണ് ക്രിസ്മസ് പാര്‍ട്ടി സംഘടിപ്പിച്ചത്. 13 മണിക്കൂര്‍ പരിപാടി നീണ്ടുനിന്നു. പാര്‍ട്ടിക്ക് ഉപയോഗിച്ച സ്പീക്കറുകള്‍ പൊലീസ് പിടിച്ചെടുത്തിട്ടുണ്ട്. ഡിജെ പാര്‍ട്ടിയുടെ ദൃശ്യങ്ങള്‍ പ്രചരിച്ചതിനെ തുടര്‍ന്നാണ് പൊഴിയൂര്‍ പൊലീസ് കേസെടുത്തത്. സംഭവത്തില്‍ കൂടുതല്‍ അന്വേഷണം നടത്തുന്നതിനും പോലീസ് തീരുമാനിച്ചിട്ടുണ്ട്
