ശാരീരിക ബുദ്ധിമുട്ടുകള്ക്കെല്ലാം പുറമേ മാനസികമായും തകര്ന്നിരിക്കുന്ന ദിവസങ്ങളായിരിക്കും ആർത്തവ ദിവസങ്ങൾ.അതുകൊണ്ടുതന്നെ ഈ ദിവസങ്ങളില് ശരീരത്തിന് കൂടുതല് ശ്രദ്ധ നല്കുകയും വേണ്ട പരിചരണം ഉറപ്പാക്കുകയും വേണം. ആര്ത്തവ ദിവസങ്ങളില് കഴിക്കേണ്ട പ്രത്യേക ഭക്ഷണക്രമം എന്നൊന്ന് ഇല്ലെങ്കിലും ഈ ദിവസങ്ങളില് ചില ഭക്ഷണങ്ങള് ഒഴിവാക്കുന്നത് നന്നായിരിക്കും.
തണുത്ത ഭക്ഷണവും തണുത്ത വെള്ളവുമൊക്കെ ആര്ത്തവദിനങ്ങളില് ഒഴിവാക്കണം. അണ്ഡാശയത്തിലെയും യോനി ഭിത്തികളിലെയും പേശികള്ക്ക് ആര്ത്തവ സമയത്തുണ്ടാകുന്ന പിരിമുറുക്കം അസ്വസ്ഥതയുണ്ടാക്കും. തണുത്ത പാനീയങ്ങള് ഒഴിവാക്കി ചെറുചൂടുള്ള വെള്ളം കുടിക്കുന്നത് സുഗമമായ രക്തപ്രവാഹത്തെ പ്രോത്സാഹിപ്പിക്കും.
ആര്ത്തവ വേദനയെ മറക്കാന് പലരും ഇഷ്ടമുള്ള ഭക്ഷണം കഴിക്കാന് ശ്രമിക്കാറുണ്ട്. ഇക്കൂട്ടത്തില് പലപ്പോഴും എണ്ണയില് വറുത്തതും പൊരിച്ചതുമായവ ഇടം പിടിക്കും. പക്ഷെ, ചിപ്സ്, കപ്പവറുത്തത്, ചക്കവറുത്തത് പോലുള്ളവയും ചെറുകടികളുമൊക്കെ ഈ ദിവസങ്ങളില് ഒഴിവാക്കുന്നതാണ് നല്ലത്. അതിനുപകരം മുഴുവന് ധാന്യങ്ങളും സംസ്കരിക്കാത്ത ഭക്ഷണവും കഴിക്കാം.
അമിതമായ ഉപ്പിന്റെ ഉപയോഗം ആര്ത്തവ ദിവസങ്ങളില് ബുദ്ധിമുട്ടുകളുണ്ടാക്കും. അതുകൊണ്ട് ഉപ്പ് കൂടുതലുള്ള പലഹാരങ്ങളും ആഹാരപദാര്ത്ഥങ്ങളും ഒഴിവാക്കുന്നത് നല്ലതാണ്. സോള്ട്ട് ബിസ്ക്കറ്റുകളും കാന്ഡ് സൂപ്പ്, നൂഡില്സ് എന്നിവയുമൊക്കെ മാറ്റിനിര്ത്താം.
രാവിലെ ഒരു ചായയോ കാപ്പിയോ ഒക്കെ കുടിക്കുന്നത് ഊര്ജ്ജം നല്കുമെങ്കിലും അമിതമായ കഫീന് ഉപഭോഗം ആര്ത്തവ സംബന്ധമായ ബുദ്ധിമുട്ടുകള് കൂടാന് ഇടയാക്കും. കഫീന് നാഡീവ്യവസ്ഥയെ ഉത്തേജിപ്പിച്ച് ഉത്കണ്ഠ, അസ്വസ്ഥത തുടങ്ങിയ പ്രശ്നങ്ങള് കൂട്ടും. ഇത് നിങ്ങളുടെ ഉറക്കത്തെയും തടസ്സപ്പെടുത്തും. അതുകൊണ്ട് ആര്ത്തവ ദിനങ്ങളിലെങ്കിലും ഹെര്ബല് പാനീയങ്ങളെ ആശ്രയിക്കുന്നതാണ് നല്ലത്.
മധുരം കഴിക്കണമെന്ന് ആഗ്രഹിക്കുമ്പോഴൊക്കെ നമ്മള് കേക്ക്, ജിലേബി, മിഠായി തുടങ്ങിയ അമിത മധുരമുള്ളവയെ ആശ്രയിക്കുന്ന പതിവുണ്ട്. പക്ഷെ, അമിതമായ പഞ്ചസാര ഉപയോഗം രക്തത്തിലെ പഞ്ചസാരയുടെ അളവില് വ്യതിയാനമുണ്ടാക്കുകയും ഊര്ജ്ജനഷ്ടം, മൂഡ്സ്വിങ്സ് പോലുള്ള ബുദ്ധിമുട്ടുകള് സൃഷ്ടിക്കുകയും ചെയ്യും. അതിനുപകരം പഴങ്ങള്, ഡാര്ക്ക് ചോക്ലേറ്റ് പോലുള്ളവയും തേന്, ഈന്തപ്പഴം, മേപ്പിള് സിറപ്പ് പോലുള്ളവ തെരഞ്ഞെടുക്കാം.