ആരോഗ്യ കാര്യത്തിൽ ഒട്ടും ശ്രദ്ധയില്ലാത്തവരാണ് സ്ത്രീകൾ എന്നാണ് പറയാറുള്ളത്. വീട്ടിലെ മറ്റ് എല്ലാവരുടെയും ആരോഗ്യം സംരക്ഷിക്കുന്ന സ്ത്രീകൾ അവരുടെ സ്വന്തം ശരീരത്തെക്കുറിച്ചും ആരോഗ്യത്തെക്കുറിച്ചും പലപ്പോഴും ചിന്തിക്കാറില്ല എന്നാതാണ്. ആർത്തവം, ഗർഭകാലം, ആർത്തവ വിരാമം തുടങ്ങി പല അവസ്ഥകളിലൂടെ ആണ് സ്ത്രീകൾ കടന്ന് പോകുന്നത്. അതുകൊണ്ട് തന്നെ ആരോഗ്യത്തിന് ആവശ്യമായ പോഷകങ്ങൾ സ്ത്രീകൾ കഴിക്കേണ്ടത് വളരെ പ്രധാനമാണ്.
സ്ത്രീകളുടെ പോഷകാഹാരം അവരുടെ ഭക്ഷണക്രമത്തെ മാത്രമല്ല, അവരുടെ സാമ്പത്തിക നില, സാമൂഹികവും സാംസ്കാരികവുമായ അന്തരീക്ഷം, വ്യക്തിഗത ശീലങ്ങൾ, പ്രായം, പ്രവർത്തന നിലവാരം, ജനിതകശാസ്ത്രം തുടങ്ങിയ ഘടകങ്ങളെ ആശ്രയിച്ചിരിക്കുന്നു. ഇരുമ്പ്, വൈറ്റമിൻ ബി 12, വൈറ്റമിൻ ഡി, കാൽസ്യം, മഗ്നീഷ്യം, ഒമേഗ -3, അയോഡിൻ, ഫോളേറ്റ് എന്നിവ സ്ത്രീകളിലെ പോഷകങ്ങളുടെ കുറവുകളിൽ ഉൾപ്പെടുന്നുവയാണ്.
അയൺ
സ്ത്രീകളിൽ വളരെ സാധാരണമായി കണ്ടുവരുന്നതാണ് അയണിൻ്റെ കുറവ്. അയണിൻ്റെ അളവ് വർദ്ധിപ്പിക്കുന്നതിനുള്ള ചില വഴികളിൽ അയൺ സമ്പുഷ്ടമായ ഭക്ഷണങ്ങൾ കഴിക്കുന്നതും ഇരുമ്പ് ആഗിരണം വർദ്ധിപ്പിക്കുന്നതിന് സഹായിക്കുന്നവയും ഉൾപ്പെടുന്നു (വിറ്റാമിൻ സി ഭക്ഷണങ്ങൾ പോലുള്ളവ), ഇരുമ്പ് സപ്ലിമെന്റ് എടുക്കുന്നതിന് പുറമേ.
ശരീരത്തിലെ ചുവന്ന രക്താണുക്കളുടെ എണ്ണം കുറയുന്നതും അസാധാരണമായ ക്ഷീണവുമാണ് ശരീരത്തിൽ അയൺ അഥവ ഇരുമ്പിൻ്റെ അഭാവം മൂലം ഉണ്ടാകുന്ന പ്രധാന ലക്ഷണം. ഇത് കൂടാതെ തലക്കറക്കം, ശ്വാസതടസം, നഖം പൊട്ടൽ, നാക്കിൽ വേദനയും വീർക്കലുമൊക്കെ ഉണ്ടാകുന്നത് അയണിൻ്റെ കുറവ് മൂലമാണ് സംഭവിക്കുന്നത്.
വൈറ്റമിൻ ഡി
സൂര്യപ്രകാശത്തിൽ നിന്നാണ് ശരീരത്തിന് ആവശ്യമായ വൈറ്റമിൻ ഡി ലഭിക്കുന്നത്. കാൽസ്യം ആഗിരണം ചെയ്യുന്നതിൽ വൈറ്റമിൻ ഡിയുടെ പങ്ക് വളരെ വലുതാണ്. ദിവസവും 10 മുതൽ 15 മിനിറ്റ് പകൽ സമയത്തെ സൂര്യപ്രകാശം കൊള്ളുന്നത് ശരീരത്തിന് ആവശ്യമായ വൈറ്റമിൻ ഡി ലഭിക്കാൻ സഹായിക്കും.
സ്ത്രീകളിൽ ഉണ്ടാകുന്ന ഡിപ്രഷൻ, പോളിസിസ്റ്റിക് ഓവറി സിൻഡ്രോം, എല്ലിൻ്റെ ബലം കുറയുക, അമിതവണ്ണം, ടൈപ്പ് 2 പ്രമേഹം എന്നിവയെല്ലാം വൈറ്റമിൻ ഡിയുടെ അഭാവത്തെ സൂചിപ്പിക്കുന്നതാണ്. വിറ്റാമിൻ ഡിയുടെ അഭാവം ക്ഷീണം, പേശികളുടെ ബലഹീനത, അസ്ഥികളുടെ അസ്വസ്ഥത എന്നിവയ്ക്കും കാരണമാകും.
കാൽസ്യം
ആർത്തവ വിരാമം വരുന്ന സ്ത്രീകളിൽ കാൽസ്യത്തിൻ്റെ കുറവ് വളരെ കൂടുതലായിരിക്കും. ഇത് ഒഴിവാക്കേണ്ടത് വളരെ പ്രധാനമാണ്. എല്ലുകളെയാണ് ഇത് കൂടുതലായി ബാധിക്കുന്നത്. എല്ലുകൾ പൊട്ടാനും വേഗത്തിൽ ബലക്ഷയമുണ്ടാകാനും ഇത് കാരണമാകും. ഓസ്റ്റിയോപൊറോസിസിനുള്ള സാധ്യത വർദ്ധിപ്പിക്കും. വളരെ വൈകിയാണ് പലരിലും കാൽസ്യം അപര്യാപ്തതയുടെ പ്രശ്നം കണ്ടെത്തുന്നത് സാധാരണമാണ്. കാൽസ്യം അളവ് കുറവുള്ള സ്ത്രീകൾക്ക് ഓസ്റ്റിയോപൊറോസിസ്, അസ്ഥി ഒടിവുകൾ എന്നിവ ഉണ്ടാകാനുള്ള സാധ്യത കൂടുതലാണ്. പലപ്പോഴും സ്ത്രീകൾ ഇതേക്കുറിച്ച് അധികം ബോധമുള്ളവരായിരിക്കും.
ഫോളേറ്റ്
ഒരു സ്ത്രീ ഗർഭിണിയായിരിക്കുമ്പോൾ ധാരാളം മൈക്രോ ന്യൂട്രിയന്റുകളുടെ ആവശ്യകത വർദ്ധിക്കുന്നു പ്രത്യേകിച്ച് ഫോളേറ്റ്, ഇരുമ്പ്, കാൽസ്യം, സിങ്ക്, മഗ്നീഷ്യം, അയോഡിൻ തുടങ്ങിയ പോഷകങ്ങൾ. ഗർഭകാലത്ത് കൃത്യമായി ഭക്ഷണം കഴിക്കേണ്ടത് വളരെ പ്രധാനമാണ്. സ്ത്രീകൾക്ക് ആവശ്യത്തിന് ഫോളേറ്റ് ലഭിച്ചില്ലെങ്കിൽ പലപ്പോഴും അത് ശ്രദ്ധിക്കാതെ പോകാറുണ്ട്. കാരണം ഇതിൻ്റെ ലക്ഷണങ്ങൾ വളരെ മിതമായതിനാൽ അത് പലപ്പോഴും സ്ത്രീകൾ കാര്യമാക്കാതെ പോകാറാണ് പതിവ്.
ക്ഷീണം, വായിൽ വേദന, നാവിന്റെ വീക്കം, നരച്ച മുടി, വളർച്ച പ്രശ്നങ്ങൾ ഇതൊക്കെയാണ് പൊതുവായ ലക്ഷണങ്ങൾ. ഇത് കൂടാതെ അനീമിയയ്ക്ക് കാരണമാകുന്ന വിട്ടുമാറാത്ത ക്ഷീണം, ബലഹീനത \ അലസത, പ്രകോപനം, ശ്വാസതടസ്സം, വിളറിയ ചർമ്മം എന്നിവയും ഇതിൻ്റെ ലക്ഷണങ്ങളാണ്.
അയോഡിൻ
ഗർഭിണിയാകാൻ ആഗ്രഹിക്കുന്ന അല്ലെങ്കിൽ ഗർഭിണിയായ യുവതികൾക്ക് അയോഡിൻ കഴിക്കുന്നത് വളരെ പ്രധാനമാണ്. കാരണം ഇത് വളരുന്ന ഗർഭപിണ്ഡത്തിന്റെ മസ്തിഷ്ക വികാസത്തിൽ ഒരു പങ്കു വഹിക്കുന്നു. ശരിയായ അളവിൽ തൈറോയ്ഡ് ഹോർമോണുകൾ നിർമ്മിക്കുന്നതിനും ഇത് നിർണായകമാണ്. നിങ്ങളുടെ മെറ്റബോളിസത്തെ നിയന്ത്രിക്കാൻ സഹായിക്കുന്ന T3, T4 എന്നീ ഹോർമോണുകൾ ഉത്പാദിപ്പിക്കാൻ തൈറോയ്ഡ് ഗ്രന്ഥിക്ക് അയോഡിൻ ആവശ്യമാണ്.
അയോഡിൻ കുറവുള്ള ഭക്ഷണത്തിന്റെ ഫലമായി തൊണ്ടയ്ക്ക് ചുറ്റുമുള്ള തൈറോയ്ഡ് ഗ്രന്ഥിയ്ക്ക് വീക്കം സംഭവിക്കാം. ശരീരത്തിലെ അയോഡിൻ്റെ കുറവ് നികത്താൻ ശ്രമിക്കുമ്പോൾ തൈറോയ്ഡ് അമിതമായി പ്രവർത്തിക്കുകയും വളരുകയും ചെയ്യുന്നു. ഈ അവസ്ഥയെ ഹൈപ്പോതൈറോയിഡിസം എന്ന് വിളിക്കുന്നു. ഭാരം കൂടുന്നത്, ക്ഷീണം, സ്ഥിരമായി തണുപ്പ് അനുഭവപ്പെടുന്നത്, മുടികൊഴിച്ചിൽ എന്നിവയെല്ലാം ഹൈപ്പോതൈറോയിഡിസത്തിന്റെ മറ്റ് ലക്ഷണങ്ങാണ്.
ഒമേഗ 3 ഫിഷ് ഓയിൽസ്
സാൽമൺ, മത്തി തുടങ്ങിയ മത്സ്യങ്ങൾ പതിവായി കഴിച്ചില്ലെങ്കിൽ ശരീരത്തിൽ ഒമേഗ 3യുടെ കുറവുണ്ടാകാൻ സാധ്യത കൂടുതലാണ്. പാശ്ചാത്യ ഭക്ഷണക്രമം കഴിക്കുന്ന മിക്ക ആളുകളും ധാരാളം ഒമേഗ -6 ഫാറ്റി ആസിഡുകൾ കഴിക്കുന്നു. ഇത് ശരീരത്തിൽ വീക്കം ഉണ്ടാകാനുള്ള സാധ്യത വർധിപ്പിക്കുന്നു. പായ്ക്ക് ചെയ്ത് വരുന്ന ഭക്ഷണങ്ങളിലാണ് ഇത് അധികമായി കണ്ടുവരുന്നത്. കൂടാതെ ചില എണ്ണകളിലും പച്ചക്കറികളിലുമുണ്ട്. ഒമേഗ 3യുടെ കുറവിൻ്റെ ലക്ഷണം ആദ്യം കാണുന്നത് ചർമ്മത്തിലാണ്. കൂടാതെ വിഷാദ രോഗം, കണ്ണുകളിൽ ചൊറിച്ചിൽ, സന്ധികളിലെ കാഠിന്യവും വേദനയും, മുടിയിലെ മാറ്റങ്ങൾ എന്നിവയും ഇതിൻ്റെ ലക്ഷണങ്ങളാണ്.
മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.
409:31 AM
