ദുബായ്: ദുബായ് ഷെയ്ഖ് മുഹമ്മദ് ബിന് സായിദ് റോഡിലുണ്ടായ ബസ് അപകടത്തില് മരിച്ചവരുടെ മൃതദേഹങ്ങള് നാട്ടിലെത്തിക്കാനുള്ള ചെലവ് പൂര്ണമായും കേന്ദ്രസര്ക്കാര് വഹിക്കുമെന്ന് കേന്ദ്രമന്ത്രി വി. മുരളീധരന്. എട്ടു മലയാളികളുള്പ്പെടെ 17 പേരാണ് അപകടത്തില് മരിച്ചത്. മരിച്ചവരില് 12 പേര് ഇന്ത്യക്കാരാണ്.
കോട്ടയം പാന്പാടി സ്വദേശി വിമല് കാര്ത്തികേയന് (അപ്പു-35), തലശേരി ചേറ്റംകുന്നിനടുത്ത സറീനാസിലെ എ.ടി. ഉമ്മര് (65), മകന് നബീല് ഉമ്മര് (21),ദുബായിലെ സാമൂഹ്യപ്രവര്ത്തകനായ തൃശൂര് തളിക്കുളം സ്വദേശി ജമാലുദ്ദീന്(47), തിരുവനന്തപുരം സ്വദേശി ദീപകുമാര്(40), വാസുദേവന് വിഷ്ണുദാസ്, തൃശൂര് ചെമ്പൂക്കാവ് സ്വദേശി കിരണ് ജോണി(25), കണ്ണൂര് മൊറാഴ സ്വദേശി രാജന് പുതിയപുരയില്(49) എന്നിവരാണു മരിച്ച മലയാളികള്. ഒമാനിലെ മസ്കറ്റില്നിന്നു ദുബായിലേക്കു വന്ന ബസാണ് വ്യാഴാഴ്ച വൈകുന്നേരം യുഎഇ സമയം 5.40ന് ദുബായിലെ റാഷിദിയ മെട്രോ സ്റ്റേഷനു സമീപത്ത് അപകടത്തില്പ്പെട്ടത്. ബസുകള്ക്കും വലിയ വാഹനങ്ങള്ക്കും പ്രവേശനമില്ലാത്ത റോഡില് ഹൈറ്റ് ബാരിയറില് ഇടിച്ചായിരുന്നു അപകടം.
