ട്വിറ്ററിന്റെ പേര് എക്സ് എന്നാക്കി ഒരാഴ്ച കഴിയുമ്പോഴാണ് മസ്ക് വീണ്ടും പേര് മാറ്റുന്നത്. ട്വിറ്റര്‍ ആസ്ഥാനത്തെ എക്സ് ലോഗോ നീക്കം ചെയ്‌തെന്നാണ് പുതിയ വാർത്ത. കമ്പനി എല്ലായിടത്തും എക്സ് ബ്രാന്‍ഡിംഗ് നടപ്പിലാക്കുന്നതിനുള്ള നടപടികളുമായി നീങ്ങുമ്പോഴാണ് ലോഗോമാറ്റിയതുമായി ബന്ധപ്പെട്ട് റിപ്പോർട്ടുകൾ വരുന്നത്. സാന്‍ ഫ്രാന്‍സിസ്‌കോയിലെ ഓഫീസിന്റെ മുകളിലെ ലോഗോയാണ് പ്രദേശവാസികളുടെ പരാതിയെ തുടര്‍ന്ന് നീക്കം ചെയ്തത്.
ട്വിറ്റര്‍ ആസ്ഥാനത്തില്‍ സ്ഥാപിച്ച ലൈറ്റിംഗോടുകൂടിയ എക്സ് ലോഗോയുടെ വെളിച്ചം രാത്രിയില്‍ ശല്യപ്പെടുത്തുന്നുവെന്നാണ് പ്രദേശവാസികളുടെ പരാതി. ഒരാഴ്ചയ്ക്കിടെ 24 ഓളം പരാതികളാണ് സാന്‍ ഫ്രാന്‍സിസ്‌കോ ഡിപ്പാര്‍ട്ട്മെന്റ് ഓഫ് ബില്‍ഡിംഗ് ഇന്‍സ്‌പെക്ഷന്‍ ആന്‍ഡ് സിറ്റി പ്ലാനിംഗ് വിഭാഗത്തിന് ലഭിച്ചത്. ഇതോടെ പരിശോധനയ്‌ക്കെത്തിയ ഉദ്യോഗസ്ഥനെ മുകളിലത്തെ നിലയിലേക്ക് കടത്തിവിടാതെ ട്വിറ്റര്‍ അധികൃതര്‍ തടഞ്ഞു. മേല്‍ക്കൂരയിലെ ലോഗോ ഒരു ഇവന്റിന് കീഴില്‍ ഇന്‍സ്റ്റാള്‍ ചെയ്തിട്ടുണ്ടെന്നും അത് താല്‍ക്കാലികമാണെന്നുമാണ് അധികൃതരുടെ വാദം.
ട്വിറ്ററിന്റെ ആസ്ഥാനം പ്രവര്‍ത്തിക്കുന്ന കെട്ടിടത്തിന് ഇതിനകം നോട്ടീസ് നല്‍കിയിട്ടുണ്ടെന്ന് ബില്‍ഡിംഗ് ഇന്‍സ്‌പെക്ഷന്‍ വിഭാഗത്തിന്റെ കമ്മ്യൂണിക്കേഷന്‍സ് ഡയറക്ടര്‍ പാട്രിക് ഹന്നന്‍ സ്ഥിരീകരിച്ചു. 24 ഓളം പരാതികള്‍ ലഭിച്ച സാഹചര്യത്തിലാണ് ലോഗോ നീക്കംചെയ്യാന്‍ തീരുമാനിച്ചത്.കെട്ടിട ഉടമയ്ക്ക് പിഴ ചുമത്തിയെന്നും അദ്ദേഹം അറിയിച്ചു.
