ദില്ലി കലാപം; കര്‍ഷകരെന്ന പേരില്‍ കലാപകാരികള്‍ പൊലീസുകാരെ വളഞ്ഞിട്ട് തല്ലി; ദൃശ്യങ്ങള്‍ പുറത്ത്

ദില്ലി: ഇന്നലെ കര്‍ഷകരെന്ന പേരില്‍ കലാപകാരികള്‍ ദില്ലിയില്‍ നടത്തിയ കലാപത്തില്‍ പരിക്കേറ്റ പൊലീസുകാരുടെ എണ്ണം 109 ആയി. 83 പൊലീസുകാര്‍ക്ക് ട്രാക്ടര്‍ റാലിക്കിടയിലാണ് പരുക്കേറ്റത്. 29 പേര്‍ക്ക് ചെങ്കോട്ടയിലെ പ്രതിഷേധത്തിനിടെയാണ് പരുക്കേറ്റത്. പരിക്കേറ്റവരില്‍ ഒരു പൊലീസുകാരന്റെ നില അതീവ ഗുരുതരമാണെന്നാണ് റിപ്പോര്‍ട്ടുകള്‍. പൊലീസുകാരില്‍ ഭൂരിഭാഗത്തെയും ദില്ലിയിലെ എല്‍എന്‍ജെപി ആശുപത്രിയില്‍ പ്രവേശിപ്പിച്ചിരിക്കുകയാണ്. കലാപകാരികളില്‍ ചിലര്‍ ആള്‍ക്കൂട്ടത്തിലേക്ക് ട്രാക്ടര്‍ ഓടിച്ചതിലും നിരവധി പൊലീസുകാര്‍ക്ക് പരുക്കേറ്റു. അതേസമയം ഇതുമായി ബന്ധപ്പെട്ട് കര്‍ഷകര്‍ എന്ന വ്യാജേന കലാപകാരികള്‍ പൊലീസുകാരെ മര്‍ദ്ദിക്കുന്ന വീഡിയോ ദില്ലി പൊലീസ് പുറത്തു വിട്ടിരുന്നു.

എന്നാല്‍, കര്‍ഷകരുടെ ട്രാക്ടര്‍ സമരം അക്രമാസക്തമായെങ്കിലും സമരത്തോട് കടുത്ത സമീപനം സ്വീകരിക്കേണ്ടെന്ന തീരുമാനത്തിലാണ് കേന്ദ്രസര്‍ക്കാര്‍. സമരം ചെയ്യുന്ന സംഘടനകളോട് അനൗദ്യോഗിക ചര്‍ച്ചകള്‍ പ്രത്യേകം നടത്താനും സംഘടനകളെ സമരത്തില്‍ നിന്ന് പിന്മാറാന്‍ പ്രേരിപ്പിക്കാനും തീരുമാനിച്ചതായാണ് സൂചന. പൊലീസുകാരെ കലാപകാരികള്‍ ആക്രമിക്കുന്ന വീഡിയോ കാണാം.