ഉഗ്രം ! ഉജ്ജ്വലം ! ഒറ്റയേറിൽ ലോക അത്‌ലറ്റിക് ചാമ്പ്യൻഷിപ്പ് ഫൈനലിൽ പ്രവേശിച്ച് നീരജ് ചോപ്ര

ടോക്കിയോ: ലോക അത്‌ലറ്റിക് ചാമ്പ്യൻഷിപ്പിൽ ഇന്ത്യയുടെ അഭിമാന താരങ്ങളായ നീരജ് ചോപ്രയും സച്ചിൻ യാദവും ജാവലിൻ ത്രോ ഫൈനലിൽ പ്രവേശിച്ചു. യോഗ്യതാ റൗണ്ടിലെ മികച്ച പ്രകടനങ്ങളിലൂടെയാണ് ഇരുവരും ഈ നേട്ടം കൈവരിച്ചത്. നിലവിലെ ചാമ്പ്യനായ നീരജ് ചോപ്ര, 84.95 മീറ്റർ ദൂരം എറിഞ്ഞ് ആറാമനായാണ് ഫൈനൽ ബെർത്ത് ഉറപ്പിച്ചത്. യോഗ്യതാ റൗണ്ടിൽ 83.67 മീറ്റർ ദൂരം എറിഞ്ഞ സച്ചിൻ യാദവ് പത്താം സ്ഥാനത്തോടെ ഫൈനലിന് യോഗ്യത നേടി.

യോഗ്യതാ റൗണ്ടിലെ ഏറ്റവും മികച്ച പ്രകടനം ഗ്രനഡയുടെ ആൻഡേഴ്സൺ പീറ്റേഴ്സിന്റേതായിരുന്നു. അദ്ദേഹം 89.53 മീറ്റർ ദൂരം എറിഞ്ഞു. പാക് താരം അർഷാദ് നദീം 85.28 മീറ്റർ എറിഞ്ഞു. യോഗ്യത നേടിയ മറ്റ് പ്രമുഖ താരങ്ങൾ: ജൂലിയൻ വെബ്ബർ (87.21 മീ.), ജൂലിസ് യെഗോ (85.96 മീ.), ഡേവിഡ് വെഗ്‌നർ (85.67 മീ.) എന്നിവരാണ്.

എന്നാൽ, യോഗ്യതാ റൗണ്ടിൽ പങ്കെടുത്ത മറ്റ് ഇന്ത്യൻ താരങ്ങളായ രോഹിത് യാദവിനും യാഷ് വീറിനും ഫൈനലിൽ എത്താനായില്ല. ഗ്രൂപ്പ് ബിയിൽ മത്സരിച്ച രോഹിതിന് 77.81 മീറ്ററും യാഷ് വീറിന് 77.51 മീറ്ററും മാത്രമാണ് എറിയാൻ കഴിഞ്ഞത്.