സംസ്ഥാന സര്‍ക്കാരിനെതിരെ സമരത്തിനിറങ്ങി ധനമന്ത്രിയുടെ ഭാര്യയും !

അത്രമേൽ നിവൃത്തി കെടുമ്പോഴാണ് അല്ലെങ്കിൽ പരിഹാരമില്ലാത്തപ്പോഴാണ് ജനങ്ങൾ സെക്രട്ടറിയേറ്റിന് മുന്നിൽ സമരം നടത്തുന്നത്. സംസ്ഥാനത്തെ ജനങ്ങളെ സർക്കാർ ആവുന്നത്ര വലയ്‌ക്കുന്നുണ്ട്. പല ആവശ്യങ്ങളുമായി നിരവധി പേരാണ് ദിവസവും‌ സർക്കാർ ഓഫീസുകൾ കയറി ഇറങ്ങുന്നത്. ഇപ്പോഴിതാ, മുഖ്യനും മന്ത്രിമാരും നവകേരള സദാസെന്ന പേരിൽ ധൂർത്തടിക്കുമ്പോൾ സർക്കാരിനെതിരെ തന്നെ സമരം ചെയ്യുകയാണ് ധനമന്ത്രി കെ. എൻ ബാലഗോപാലിന്റെ ഭാര്യ ഡോ. ആശ പ്രഭാകരൻ.

ഡിഎ ഉൾപ്പെടെയുള്ള ആവശ്യങ്ങളുമായി സർക്കാരിനെതിരെ നടത്തിയ സമരത്തിൽ ധനമന്ത്രി കെഎൻ. ബാലഗോപാലിന്റെ ഭാര്യ ഡോ. ആശ പ്രഭാകരൻ പങ്കെടുത്തതിന്റെ ദൃശ്യങ്ങളാണ് നമ്മൾ ഇപ്പോൾ കണ്ടത്. കോളജ് അധ്യാപകര്‍ക്ക് നിഷേധിച്ച, ഡിഎ സംസ്ഥാന സര്‍ക്കാര്‍ ഉടന്‍ നല്‍കുക എന്ന ആവശ്യവുമായാണ് കോളജ് അധ്യാപക സംഘടനയായ AKPCTA സെക്രട്ടേറിയറ്റ് ധര്‍ണയും ഉപവാസവും നടത്തിയത്. സംഘടനയുടെ വനിതാ വിഭാഗം കണ്‍വീനറാണ് ഡോ.ആശ. അതേസമയം, സമരത്തിൽ ആദ്യാവസാനം വരെ സജീവമായിരുന്നു ആശ. ഉറച്ച ശബ്ദത്തോടെ സർക്കാരിനെതിരെ മുദ്രാവാക്യം മുഴക്കുകയും ചെയ്തു. നിഷേധിച്ച ഡിഎ, ഏഴാം ശമ്പള പരിഷ്കരണത്തിന്റെ പൂർണ ആനുകൂല്യങ്ങൾ, വിരമിച്ച അദ്ധ്യാപകരുടെ പെൻഷൻ എന്നിവ അനുവദിക്കുക, വർക്‌ ലോഡ് കമ്മിറ്റി ശുപാർശ നടപ്പാക്കുക, വിരമിച്ച അദ്ധ്യാപകരുടെ സർവീസ് പ്രശ്നങ്ങൾ പരിഹരിക്കുക, ഗെസ്റ്റ് അദ്ധ്യാപക വേതനം കൂട്ടുക, ഉന്നതവിദ്യാഭ്യാസ രംഗത്തെ വർഗീയവൽക്കരണവും അമിതാധികാര പ്രയോഗവും അവസാനിപ്പിക്കുക എന്നീ ആവശ്യങ്ങൾ ഉന്നയിച്ചായിരുന്നു ഉപവാസം. കൂടാതെ, നവകേരള സദസ്സിലെ പ്രസംഗത്തില്‍ ശമ്പളക്കുടിശ്ശിക നല്‍കിയെന്ന് മുഖ്യമന്ത്രി പറഞ്ഞതു, തെറ്റാണെന്നും കോളേജ് അധ്യാപകര്‍ ചൂണ്ടിക്കാട്ടി. ക്ഷാമബത്തയില്‍ 29 ശതമാനമാണ് കോളേജ് അധ്യാപകരുടെ കുടിശ്ശിക. കേന്ദ്രാവഗണനയ്‌ക്കെതിരേ നവകേരള സദസില്‍ മുഖ്യമന്ത്രിയും മന്ത്രിമാരും നിരന്തരം പ്രസംഗിക്കുമ്പോഴാണ് സംസ്ഥാന സർക്കാരിനെതിരെ ധനമന്ത്രിയുടെ ഭാര്യയുൾപ്പെടെ രംഗത്തെത്തിയിരിക്കുന്നത്.