തിരുവനന്തപുരം : തലസ്ഥാനത്തെ ഫുട്ബോൾ പ്രേമികളെ ആവേശത്തിലാഴ്ത്തി ഐ എം വിജയൻ അടക്കമുള്ള ഇതിഹാസ താരങ്ങൾ വീണ്ടും കളിക്കളത്തിലേക്ക്. തിരുവനന്തപുരം പ്രസ് ക്ലബ് സംഘടിപ്പിക്കുന്ന മീഡിയ ഫുട്ബാൾ ലീഗിനോട് അനുബന്ധിച്ചാണ് മുന് ഇന്ത്യന് താരങ്ങളും സന്തോഷ് ട്രോഫി താരങ്ങളും ഉള്പ്പെടുന്ന ടീമുകൾ തമ്മില് ചന്ദ്രശേഖരന്നായര് സ്റ്റേഡിയത്തില് ഏറ്റുമുട്ടുന്നത്. വരുന്ന ചൊവ്വാഴ്ച (ഏപ്രിൽ 22 ) വൈകുന്നേരം 4 മണിക്ക് ഫുട്ബോൾ ഇതിഹാസം പത്മശ്രീ ഐ.എം വിജയന് തലസ്ഥാനത്തിൻ്റെ ആദരം അർപ്പിക്കും. ഇതിന് ശേഷമാകും പ്രദർശന മത്സരം നടക്കുക
ഐ എം വിജയൻ ഇലവനിൽ യു.ഷറഫലി, സി വി പാപ്പച്ചൻ, കെ ടി ചാക്കോ, ആസിഫ് സഹീർ, കുരികേഷ് മാത്യു, ഗണേഷ്, പി.പി.തോബിയാസ്, അലക്സ് എബ്രഹാം, സുരേഷ് കുമാർ , സുരേഷ്, മൊയ്ദീൻ ഹുസൈൻ, അജയൻ, സുരേഷ് ബാബു, ജയകുമാർ എന്നിവരും ജോപോൾ അഞ്ചേരി നയിക്കുന്ന ടീമിൽ മാത്യു വർഗീസ്, ജിജു ജേക്കബ്, ശിവകുമാർ, വി പി ഷാജി, കണ്ണപ്പൻ, ശ്രീഹർഷൻ.ബി.എസ്, ഇഗ്നേഷ്യസ്, എബിൻ റോസ്, എസ്.സുനിൽ, ഉസ്മാൻ, നെൽസൺ, ബോണിഫേസ് , ജോബി ജോസഫ്, ജയകുമാർ വി, വാൾട്ടർ ആൻ്റണി എന്നിവരും കളിക്കളത്തിലിറങ്ങും.
ഐ എം വിജയൻ ഇലവനും ജോപോൾ അഞ്ചേരി ഇലവനും തമ്മിലുള്ള മത്സരം കാൽപ്പന്തുകളിയുടെ പോരാട്ടവീര്യം ഫുട്ബോള് പ്രേമികള്ക്ക് സമ്മാനിക്കുമെന്ന് പ്രസ് ക്ലബ് പ്രസിഡൻ്റ് പി.ആർ.പ്രവീണും സെക്രട്ടറി എം. രാധാകൃഷ്ണനും അറിയിച്ചു.
