പ്രേമത്തിന് ശേഷമുള്ള തിരിച്ചു വരവ് വെറുതെയാകില്ല!! അല്‍ഫോന്‍സ് പുത്രന്റെ ‘ഗോള്‍ഡ്’ റിലീസ് തീയതി നവംബര്‍ 23ന് അറിയാം

പൃഥ്വിരാജിനെ നായകനാക്കി അല്‍ഫോന്‍സ് പുത്രന്‍ സംവിധാനം ചെയ്യുന്ന ചിത്രമാണ് ഗോള്‍ഡ്. പ്രേമം എന്ന സൂപ്പര്‍ ഹിറ്റ് ചിത്രത്തിന്റെ വിജയത്തിന് ശേഷം ഒരു നീണ്ട ഇടവേളക്കിപ്പുറം സംവിധായകന്‍ അല്‍ഫോന്‍സ് പുത്രന്‍ മടങ്ങി വരുന്നു എന്ന സവിശേഷത ഈ ചിത്രത്തിനുണ്ട്. പൃഥ്വിരാജ് – നയന്‍താര എന്നിവരെ പ്രധാന കഥാപാത്രമാക്കി ഒരുക്കിയിരിക്കുന്ന സിനിമ ഏറെ പ്രതീക്ഷയോടെയാണ് ആരാധകര്‍ കാത്തിരിക്കുന്നത്.

ഇപ്പോള്‍ ഇതാ ചിത്രത്തിന്റെ റിലീസുമായി ബന്ധപ്പെട്ട ഏറ്റവും പുതിയ അപ്‌ഡേറ്റ് പങ്കുവെച്ചിരിക്കുകയാണ് നിര്‍മ്മാതാവായ ലിസ്റ്റിന്‍ സ്റ്റീഫന്‍. ചിത്രത്തിന്റെ റിലീസ് തീയതി നവംബര്‍ 23ന് ഉച്ചയ്ക്ക് 1.12ന് പുറത്തുവിടുമെന്ന് ലിസ്റ്റിന്‍ സ്റ്റിഫന്‍ അറിയിച്ചിരിക്കുന്നത്.

നേരത്തെ, ഓണം റിലീസായി ചിത്രം തിയേറ്ററുകളില്‍ എത്തുമെന്നായിരുന്നു തീരുമാനിച്ചിരുന്നതെങ്കിലും പോസ്റ്റ് പ്രൊഡക്ഷന്‍ ജോലികള്‍ പൂര്‍ത്തിയാകാതിരുന്നതോടെ റിലീസ് മാറ്റി വെയ്ക്കുകയായിരുന്നു. ഏഴ് വര്‍ഷങ്ങള്‍ക്ക് ശേഷമാണ് അല്‍ഫോന്‍സ് പുത്രന്‍ ഒരു ചിത്രം സംവിധാനം ചെയ്യുന്നത്.

പ്രേമത്തെക്കാള്‍ വലിയൊരു ഹിറ്റ് ആയിരിക്കും ഗോള്‍ഡ് എന്നാണ് ആരാധകര്‍ പ്രതീക്ഷിക്കുന്നത്. പൃഥ്വിരാജ് പ്രൊഡക്ഷന്‍സ്, മാജിക് ഫ്രയിംസ് എന്നിവരാണ് ചിത്രത്തിന്റെ നിര്‍മാതാക്കള്‍. ജോഷി എന്ന കഥാപാത്രത്തെയാണ് പൃഥ്വിരാജ് അവതരിപ്പിക്കുന്നത്.

സംവിധാനത്തിന് പുറമെ സിനിമയുടെ എഡിറ്റിങ്ങും സ്റ്റണ്ടും വിഷ്വല്‍ ഇഫക്റ്റ്സും ആനിമേഷനും കളര്‍ ഗ്രേഡിങ്ങുമൊക്കെ അല്‍ഫോന്‍സ് തന്നെയാണ് നിര്‍വഹിക്കുന്നത്. ആനന്ദ് സി. ചന്ദ്രനും വിശ്വജിത് ഒടുക്കത്തിലുമാണ് ഛായാഗ്രാഹകര്‍. സംഗീതം രാദേഷ് മുരുകേശന്‍.